Eadnemáddu-bihtáin buvttada Det Norske Teatret vuosttaš háve čájálmasa sámi friddjateáhteriin.
– Nuorra nisu vásiha veahkaválddálašvuođa, ja nuorra vearredahkki beassá eret das. Ja go riektevuogádat ii doaimma, de ferte olmmoš ieš ohcat muhtunlágan dássedeattu. Nu čállá Det Norske Teatret dán bihtá birra preassadieđáhusas.
Pia Maria Roll lea bihtá bagadalli. Márjá Karlsen, Raisa Porsanger ja Hege Pålsrud leat lávde- ja bivttashábmejeaddjit. Anders Rimpi lea nuohttadahkki. Sara Margrethe Oskal, Ole-Henrik Bjørkmo Lifjell, Niklas Gundersen, Kirsti Stubø og Joachim Rafaelsen leat neavttárat.
Várggáid muitalus
Sii čállet viidáseappot ahte Eadnemáddu-bihtás oaidnit mii Várggáin geavvá.
– Várggát, mii doalaha Norgga nationálastáhta nuorti ráji. Várggáid duohken lea dušše jiekŋamearra. Várggáid ladni huksejuvvui vuosttaš háve 1300-logus. Árktalaš guovllus eai leat muorat. Áidna muorra lea skáhpi mii lea vižžojuvvon ladni šilljui, mii juohke čavčča gokčojuvvo bures vai árktalaš dálvi ii dan gotte. Skáhpi šaddá dál 20 jagi, ja dan gal ferte ávvudit. Vai eanet olbmot háliidivčče fitnat Várggáin dahje ásaiduvvat Várggáide, lágiduvvo olles festivála skáhpái. Nuorra Almmái šaddá prošeaktajođiheaddjin. Muhto suoivvamáilmmis lea juoga. Juoga mii nu mii lea su čuovvulan gitta deike, olggomus olggut báikái. Son ii beasa šat gosage.
Ođđa sátni
Eadnemáddu lea ođđa sátni man lávdedáiddár Juho-Sire, dahje Siri Broch Johansen, lea ráhkadan.
– Nu mo mii dovdat cubbomáttu, de lea Juho-Sire smiehttan mii buot etniid máddu livččii, ja makkár doaibma sus livččii. Son fuolaha ahte sii, geat givssidit etniid bártniid dahje nieiddaid, ferte máistit daid bohtosiid mii sutnje gullá. Hás máŋggas min riikkas dárbbašivččii Eadnemáttu? jerro preassadieđáhusas. Norgga kulturfoanda, Fond for lyd og bilde, Sámediggi, Davvi Lávdedáidda ja Fritt ord leat dorjon buvttadeami. Dasa lassin lea Dramatikkens hus dorjon teakstačállima. Álgočájálmas lea skábmamánu 24.b. diibmu 20.00 Det Norske Teatret Lávdi 3:s Oslos. Lávdegiella lea dárogiella, muhto tihttel dán bihtás lea sámegillii.
