Trafikverket Ruoŧas dieđihit ahte E10 luodda gaskal Björklidena, Riksgränsen ja Norgii lea giddejuvvon heajos dálkki geažil olles mánnodaga gitta eahkedii.
Dál lea borga ja garra dálkkit guovllus mii dagaha ahte luodda lea giddejuvvon. Maiddái gaskal Rautasa ja Duortnosjávrri lea vuodjinráddjehus go lea garra borga ja guoldu guovllus.
Luodda lea gitta otná eahkedii diibmu 18.00, muhto dat sáhttá maid rievdat, dieđiha Trafikverket.
Maiddái Norgga bealde lea EV10 Bjørnfjell giddejuvvon dieđiha Stáhta geaidnodoaimmahat iežaset neahttasiiddus.
