Dutkit galget dutkat mii álggaha, hehtte dahje unnida sámi ealáhushutkosiid doaibmavejolašvuođa sámi guovlluin. Ođđa dutkanvuohki geavahuvvo mii lea gulahallama bokte.
Dutkit galget dutkat mii álggaha, hehtte dahje unnida sámi ealáhushutkosiid doaibmavejolašvuođa sámi guovlluin. Ođđa dutkanvuohki geavahuvvo mii lea gulahallama bokte.
Ođas dutkamis lea ahte Norut ii galgga dutkat ealáhusaid, nu go lea dábálaš dutkanvuogádat. Sii galget dutkat ovttas ealáhusaiguin, ja čuvvot erenoamážit sámi ealáhusaid mat leat sámi mátkeealáhusas, čállá Norut ruovttusiiddus.
– Mii geahččaladdat gulahallama bokte ovttasbargat dutkiiguin ja sámi fitnodagaiguin. Mihttu lea ovdánahttit máhtu ovttas, muitala Norut Álttá prošeaktajođiheaddji Line Mathisen.
Dovdet gullevašvuođa
Muitaleaddjit ožžot vejolašvuođa kommenteret dutkangávdnosiid prošeavttas dađistaga. Dutkit bovdejit gulahallančoahkkimiidda dađistaga, ja muitalit makkár bohtosiid sii leat gávdnan ja bivdet oaiviliid.
– Dát lea ođđa vuohki movt ovttasbargat, ja oažžut dieđuid entreprenevrrain guhkit áiggi badjel. Dat sáhttá muittuhit akšuvdnadutkanvuogádaga go hui lagas ovttasbargu lea doaimmaiguin. Muhto dás galgat iskat movt muitaleaddjit geat servet dutkamii maid sii dahket go leat mielde dutkanproseassas. Mii jáhkkit ahte sii de dovdet eanet gullevašvuođa dasa mii dáhpáhuvvá, čilge son.
Dutkit galget čuovvut deaivvademiid gos mátkeealáhusat leat fárus. Sii galget vuoruid mielde leat mielde seminárain ja gulahallančoahkkimiin maid dutkit lágidit.
Golmma jagi badjel dutket
Prošeakta lea ožžon golbma miljovnna ruvnno Davvi-Norgga Regionála dutkanfoanddain (RFF), ja prošeakta plánejuvvo bistit golbma jagi. Dasa lassin čađaha Norut unnibuš prošeavtta Sámedikki ovddas mas ulbmil lea lasihit ođđa fitnodatásahemiid sámi guovlluin.
– Lea dehálaš buohtastahttit dan guokte prošeavtta, ja geahččalit lonohallat prošeavttaid bohtosiid, muitala Norut-dutki.
Dutkiin lea lagas ovttasbargu Sámi Mátkeealáhusain man NordNorsk Reiseliv doaimmaha.
Geavahit máhtu ovdánahttimis
Entreprenevrrat leat hui unna fitnodagažat mat barget mátkeealáhusain ja kulturealáhusain. Sii fállet ovdamearkka dihte luonddu- ja kulturvásáhusaid, mas sáhttet leat oassin sámi muitalus muitaleapmi, biebmu dahje juoigan. Lea maid dehálaš dutkiide geahčadit movt váikkuhandoaibma lea Sámediggái, Innovašuvdna Norgii ja earáide.
– Mii áigut nannet máhtu maid sii sáhttet geavahit siskkáldasas fitnodagas vai ovdánahttet, muitala Line Mathisen.
Dutkit galget ovttasbargat Dalarna allaskuvllain Ruoŧas, geahčadan dihte movt sullasaš prošeavttat leat čađahuvvon doppe. Sii ovttasbarget maid UiT Norgga árktalaš universitehtain, Lášmmohallama, mátkeealáhusa ja sosiálafága fakultehtain.
