Dutkit oaivvildit ahte gievruda báikkálaš demokratiija jus diktá 16-jahkásaččaid jienastit. Dan leat gávnnahan maŋŋil go guktii leat geahččalan.
Dutkit oaivvildit ahte gievruda báikkálaš demokratiija jus diktá 16-jahkásaččaid jienastit. Dan leat gávnnahan maŋŋil go guktii leat geahččalan.
Diimmá suohkanválggain ledje vuolidan jienastanagi 16-jahkásaččaide 20 suohkanis miehtá Norgga. Seammalágan geahččalandoaibma lei maid 2011 suohkanválggain.
Servodatdutkama Instituhta dutkit leat geahččan geahččalandoaimma bohtosiid. Sii leat gávnnahan ahte das leat váikkuhan riikka demokratiija.
Buorit ákkat
– Sii geat ballet ahte leat heajos váikkuhusat jus diktá nuoraid jienastit, eai dárbbaš ballat. Muhto sii geat jáhkket das leat buorit váikkuhusat, sáhttet maid vuolidit sávaldagaideaset, lohká Johannes Bergh. Son lea lágidan raportabarggu. Raporta almmuhuvvo odne.
Dutkit oaivvildit ahte leat buorit ákkat diktit nuoraid jienastit. Raporttas čuožžu:
– Nuoraid máhttu politihka ja demokratiija birra buorrána. Lea maid dehálaš diktit buot nuoraid lohkát iežas oaivila báikkálaš demokratiijas.
Mánáidáittardeaddji illuda
Mánáidáittardeaddji Anne Lindboe illuda go diekkár boađus lea.
– 16-jahkásaččat leat gergosat beassat jienastit, lohká son.
– Go vuolida jienastanagi suohkan- ja fylkkadiggeválggain, de viiddida dat demokratiija ja buktá vejolašvuođa árrat juo ráhkadit buriid dábiid. Árvvoštallamat čájehit ahte vuolit ahkemearri maid sihkkarastá nuorat oasseváldiid suohkanstivrraide. Dat gievruda demokratiija, lohká Lindboe.
Son čujuha dasa go ahte unnimus 167 suohkana dikte 16-jahkásaččaid jienastit álbmotjienastemiin suohkanovttastusáššiin.
Norgga mánáid- ja nuoraidorganisašuvnnaid riikkaráđđi maid oaivvildit ahte jienastanahki galgá vuoliduvvot. Sii oaivvildit ahte gielddaministtar Jan Tore Sanner (Olgeš) berre dutkiid váldit vuhtii.
– Mii diehtit ahte jienastuslohpi 16-jahkásaččaide doaibmá. Dás lea stáhtaráđđi gii cakkada demokratiija viiddideami, lohká stivrrajođiheaddji Stian Seland.
Oallugat servet
Dat mii hirpmahuhtii dutkiid lei go nu olu nuorat jienastedje. Ledje eambbo 16- ja 17-jahkásaččat geat jienastedje, go olbmot 19-25-jahkásaččat.
Bohtosat čájehit maid ahte 16-jahkásaččat, geat 2011:s jienastedje, eai lean eambbo áŋgirat jienastit 2013 ja 2015 válggain.
– Bohtosat čájehit ahte vaikko vuolida ahkemeari, de ii mearkkaš ahte eambbosat jienastit boahtteáiggis, nu go oallugat ledje sávvan, lohká Bergh. ©NTB
