Oslo universitehtabuohcciviesu dutkit áigot dál dutkat sáhttá go guolevuodja geahpedit koronanjoammunvára.
Bargu huksehuvvo gávdnosa vuođul mii fuomášuvvui dan stuorra koronandutkosis mii álggahuvvui giđđat, dieđiha Oslo univertsitehtabuohcciviessu preassadieđáhusas.
– Mii vávjit ahte guolevuodjageavaheddjiin lea unnit riska oažžut koronavirusa, ja unnit njoammunvárra maid duođalaš dávddaide , dadjá Oslo universitehtabuohcciviesu mikrobiologiija ossodaga doavttir ja dutki Arne Søraas.
Dattetge ii sáhte duođaštit ahte lea go guolevuodjageavaheddjiid eallinvuohki mii dagaha dán, dahje lea go guolevuodja.
– Dan háliidat mii dál dutkat, dadjá Søraas.
Guolevuodjadutkosii galget searvat unnimusat 70 000 olbmo, ja de lea okta dain stuorámus klinihkalaš dutkosiin mii goasse lea dahkkon Norggas.
OUS doavttir spesialiseremis, Saumia Shankarr, dadjá NRK:i ahte dutkkus sáhttá leat dehálaš olbmuide geain lea sevdnjes liiki.
– Ulbmiljoavku leat sii geain lea D-vitamiidnavátni. Mii diehtit ahte sis geain lea sevdnjes liiki lea dávjá D-vitamiidnavátni. Danne lea dehálaš oažžut mielde oallugiid geain lea vátni, dahje sevdnjes liiki, nu ahte sáhttit oaidnit čuozahusa das, dadjá Shankarr.
(©NTB)
