Kárášjohkalaš váidá olgoriikkalaččaid geaid navdá suoládan muoraid, politiijat leat dutkagoahtán ášši.
Kárášjohkalaš váidá olgoriikkalaččaid geaid navdá suoládan muoraid, politiijat leat dutkagoahtán ášši.
Ikte eahkedis beaggigođii sosiála mediain ahte olgoriikkalaččat leat suoládan muoraid geaidnoguoras gaskal Kárášjoga ja Porsáŋggu. Oarje-Finnmárkku politiijat ohcagohte guokte biilla man cavgileaddjit navde gullat muorrasuollagiidda. Politiijat dieđihedje álggos ahte eai gávdnan muoraid, muhto dušše rissiid.
– Dat ii doala deaivása, lea sáhka sullii 30 muoras. Politiijaide čilgejedje olgoriikkalaččat ahte ledje gávdnan muoraid geaidnoguoras, ja danin eat dutkan ášši dađi eanet, čilge Oarje-Finnmárkku guovlluleansmánni Terje Wikstrøm.
Kárášjohkalaš váidá
Muhtin kárášjohkalaš dievdu lea dieđihan ahte su muorat leat jávkan ja suoláduvvon geaidnoguoras, son dáhtu olgoriikkalaččaid váidit ihttin. Danin lea ášši jorran nuppe guvlui ja politiijat leat dattege dutkagoahtán dan.
– Go soames váidá ášši, de dat rievdá oalát. Politiijat Ávanuoris dutket dál olgoriikkalaččaid, guđas balahuvvojit seaguhuvvon áššái, čilge Wikstrøm.
Sáhttet sáhkohallat
Oarje-Finnmárkku guovlluleansmánni muitala ahte lea erohus sniehpisvuođas ja suoládeamis. Jus soames lea iešdáhtos dolvon juoidá mii gullá nubbái, de lea suoládan ja sáhttá áššáiduhttot dan vuođul.
– Jus suolaáššis gávnnahallá sivalažžan, de sáhkohallo. In áiggo ruhtasupmiid gal einnostit, dat gal lea juristtaid duohken, lohká Wikstrøm.
Olgoriikkalaččat eai balahuvvo eará rihkusáššiide sorron.
