Sámi allaskuvla álggaha dutkanprošeavtta mas gehččet mo nuorra badjeolbmot vásihit rasismma.
Prošeaktajođiheaddji Ketil Lenert Hansen muitala Sámi allaskuvlla neahttasiiddus ahte Mihá-dutkosis «Nuorra sámiid psyhkalaš dearvvašvuohta» bođii ovdan ahte sámi nuorain leat iešguđetlágan muitalusat mo leat vásihan vealaheami, rasismma, givssideami ja neahttacielaheami ja vaššiságaid.
– Oallugat leat vásihan badjelgeahččama skuvllas, báikegottiin ja neahtas. Raporta rávvii bargat aktiivvalaččat ja systemáhtalaččat eastadit ahte sámi nuorat vásihit vealaheami ja sámevaši. Ođđa dutkanprošeavttas galgat geahčadit eambbo boazosámi nuoraid vásáhusaid, muitala prošeaktajođiheaddji.
Vásihit ollu unohisvuođa
Prošeavtta ulbmil lea čalmmustahttit rasismma maid nuorra badjeolbmot vásihit ja evttohit doaibmabijuid mat eastadit rasismma ja vaššiságaid.
– Rasisma lea duođalaš servodatváttisvuohta ja boazosámi nuorat leat suojehit dilis ja šaddet vásihit olu cielaheami ja vaššisániid.
Dutkkus čađahuvvo ovttasráđiid Boazosápmelaččaid Riikkaservviin ja Sámi joatkkaskuvllain ja boazodoalloskuvllain. Dutkanjoavkkus leat prošeaktajođiheaddji Ketil Lenert Hansen, Sámi allaskuvlla professor Nils Oskal, professor Anne Lindblom, vuosttašamanueansa Ylva Jannok Nutti ja vuosttašamanueansa Hadi Lile.
