Dálkkádatrievdan maid rievdada guohtundili. Go Guohtumat jikŋot de šaddet bohccuid biebmagoahtit fuođđariiguin.
Eanandoallo- ja biebmodepartemeantta almmuha dál ahte Høgskolen i Innlandet dutkagohtet makkár váikkuhusat lassibiebmamis lea oanehit ja guhkit áiggi badjel.
– Okta váldohástalusain boazodoalus lea váikkuhus mii čuovvu dálkkádatrievdamiin. Dán dálvvi lea ealáhus duođas dovdan dan, njuolga maŋŋel guohtunroasu mii lei 2020:s, lohká eanandoallo- ja biebmoministtar Sandra Borch preassadieđáhusas.
– Dat lea dehálaš dutkat strategiijaid movt heivehit dálkkádaga ektui, ja mo dat strategiijat váikkuhit boazodoalloealáhussii, lohká Borch.
Čohkket dieđuid árbevirolaš máhtu dearvvašvuođa ja dávddaid ektui
«Welfed» prošeakta galgá gávnnahit movt bohccuid lassibiebman váikkuha elliid čálgui, dearvvašvuhtii ja movt boazu dáhka. Prošeavtta bokte galget maid geahččat movt dát váikkuha sámi kultuvrii ja árbevirrui guhkit áiggi badjel.
Jearahallamiid bokte galget dutkit boazodolliiguin čohkket dieđuid ealáhusa árbevirolaš máhtu birra mii guoská dearvvašvuođa ja dávddaid ektui, ja dasa lassin čohkket dieđuid man ollu ja makkár fuođđariid geavahit.
Prošeavttas áigot maid čohkket dieđuid GPS-čeabetbáttiin maid bidjet misiide, ja geahččat movt boazu dahká ja rievdá go movtge go ii leat bággu ohcagoahtit biepmu mii lea muohttaga vuolde.
Ovttasbargoprošeakta
Golmma jagi badjel čohkkejit dieđuid ja varraiskosiid iskan dihte leat go njoammudávddat.
Dát prošeakta čađahuvvo ovttas boazodolliiguin Trøndelágas, Nordlánddas ja Finnmárkkus, mas oassin lea iešguđetlágan biebmanvuogit. Njuovvama oktavuođas váldet maid iskosiid.
Prošeavtta jođiha Høgskolen i Innlandet ovttas eará dutkanásahusaiguin nu go Nordlandsforskning, Norsk Institutt for bioøkonomi (NIBIO), Norgga Árktalaš universitehtain (UiT) ja Sveriges Lantbruksuniversitet (SLU), ja Forskningsrådet lea dutkan prošeavttas mielde, mii bistá gitta skábmamánu 2025 rádjái.
