Dutkamuš mo matemathihkkafága sáhttá váikkuhit desseárvui ja sosiála vuoigatvuhttii skuvllas, dan dahká UIT dutkanjoavku ovttas eará univeristehtaguin «miehtá máilmmi».
Sáhttá go matematihkkafága nannet iešguđetge gielaid ja kultuvrraid girjáivuođa? Dat lea okta gažaldat maid dat dutkanjoavku galgá gávnnahit, dieđiha UiT Norgga árktalaš universitehta preassadieđáhusas.
Dutket mo sáhttet buoridit matematihkkaoahpahusa
Dutkanjoavkku postdok Anita Movik Simensen lea mielde MIM-prošeavttas ja son bargá UiT:s instituhta oahpaheaddjeoahpahusa ja pedagogihkalaš ossodagas. Son čujuha sin dutkanjoavku galgá gávnnahit mo sáhttá dahkat matematihka buorebun dasa gii boahtá eret Deanus, Oslos, Bucurestis dahje Somalia oaivegávpogis.
– Mii leat Norggas, gos mii čohkket diehtomateriála davvin Finnmárkkus gitta máttás Osloi, ja mii áigut gávnnahit mo sáhttá bargat matematihkkaoahpahusain eamiálbmot- ja migrašuvdnakonteavsttas, muitala Mo.
– Mis lea fokus skuvllaide gos leat oahppit geain lea sámi ja/dahje kvena duogáš ja ohppiide geain lea eará riikkaid duogáš, lohká Anita Movik Simensen.
Son muitala ahte dutkanjoavku čakčat lágida konferánssa gos fáddán lea minoritehtagiella ja eamiálbmotkultuvrrat. Konferánssa sisdoallu lea mo dan sáhttá čatnat matematihkkafága oahpahussii. Konferánsa lágiduvvo skábmamánu 8. ja 10. beaivvi Álttás.
