Nuorat geardi lea hilgon guoli, vaikke sin mielas lea njálggat. Iskkadeamit čájehit ahte otná guollebuktagat eai heive nuoraid borrandábiide.
Nuorat geardi lea hilgon guoli, vaikke sin mielas lea njálggat. Iskkadeamit čájehit ahte otná guollebuktagat eai heive nuoraid borrandábiide.
Norggas eai bora šat olu guoli, maŋemuš jagiid lea njiedjan. Norges Sjømatråd, Norgga Mearrabiebmoráđi logut čájehit ahte njiejai 15 proseanttain 2015 rájes 2016 rádjái.
Maŋemuš viđa jagis lea njiedjan 26 proseantta.
Ii leat dušše divron
Dutkaninstituhtta, Forbruksforskningsinstituttet SIFO, lea Sjømat Norge ovddas iskan mii dagaha ahte norgalaččat eai bora eambbo guoli ja mearabiepmu.
Luossa lea divron, ja sáhttá unnit áiggi njiedjama čilget, muhto iskkadeapmi čájeha ahte leat eambbo ákkat.
Ii heive borrandábiide
Leat erenoamážit nuorat ja bearrašat mat borret unnán guoli ja mearabiepmu. Muhto dat lea fas stuora oassi 50 jahkásaččaid ja boarráset olbmuid borrandábiin.
Njealjis logásis geat leat badjel 70 jagi, lohket ahte borret guoli golmma-njeallje geardde vahkkus.
Dat lohku njiedjá dađi nuorat olbmuin jearrá. 25 proseantta sis geat leat gaskkal 50 ja 70 jagi lohket dan seamma, ja dušše 10-13 proseantta sis geat leat vel nuorabut lohket dan seamma.
Nuorat olbmot oaivvildit ahte guolli ja mearrabiebmu ii heive sin borrandábiide. Go mánát leat bearrašis, de lea maid hárve guolli borranbeavdde alde.
– Logut čájehit ahte lea buolvarievdan, ii ge eallinvuohkerievdan, lohká dutki Annechen Bahr Bugge.
Son lohká ahte soađi rájes leat norgalaččaid borrandábit rievdan. Olbmot borret unnit guoli, buđehiid ja mielkki, ja borret eambbo bierggu.
– Guolli lea njálggat muhto biergu lea buoret
Dat mii dutkiid hirpmáhuhtii eanemus lei go 86 proseantta nuoramusain (18-34 jahkásaččat) oaivvildit ahte guolli lea njálggat, muhto biergu lea garra gilvaleaddji.
Nuoramusat oaivvildit ahte čuopma ja dávttit vurjet go galgá borrat. Sii maid oaivvildit ahte lea álkit bierggu ráhkadit go guoli, ja maid ahte biergguin lea álkit rievddadallat makkár biepmu ráhkada.
– Lea čielggas ahte otná mearabiepmut eai leat dakkárat go nuorat geardi háliidivčče. Bierggu lea álkit heivehit pizzai, tacoi ja pastai, lohká Bugge.
