-Almmuhus-
SMÁVVAOĐĐASAT SÁMISDušše guovttis lohkásis geavahit jealmma

Dušše guovttis lohkásis geavahit jealmma

-

-

Vaikke eanaš sihkelastit geavahit oaivesuoji, de mieđihit guovttis lohkásis ahte eai goassege geavat jealmma. – Beare oallugat sihkkelastet jealmma haga, oaivvilda Trygg Trafikk. 

Ođđa guorahallamis vástidit 66 proseantta ahte geavahit dávjá dahje álo jealmma go sihkkelastet, 16 proseantta geavahit muhtumin oaivesuoji ja 18 proseantta ges eai goassege. 

– Jealbma lea deháleamos sihkkelastiid sihkarvuhtii. Lea buorre go eanaš oassi geavahit oaivesuoji go sihkkelastet, muhto seammás leat olles 34 proseantta geat šluđustallet jealbmageavahemiin. Lea surgat go nu oallugat daid searvvis eai oba ge geavat jealmma, lohká Trygg Trafikk gulahallanhoavda Ingrid Trømborg preassadieđáhusas. 

Trygg Trafikk ja Tryg dáhkádusfitnodat dat leat diŋgon iskkadeami man YouGov lea čađahan. 

Šaddan eanet šluđut

Norgga sihkkelastit leat šaddan eanet šluđut jealbmageavaheami ektui. Sullasaš guorahallamis vástidii oainnat 73 proseantta ahte geavahit dávjá dahje álo oaivesuoji. 

– Mii leimmet dieđusge sávvan ahte lohku lassána diimmá ektui ja danin leat beahtahallan go olbmot baicce leat šaddan eanet šluđut jealbmageavaheami ektui. Dat čájeha ahte lea dárbu bargat guottuidnuppástuhttimiin. Olbmot gal dihtet ahte jealbma lea dehálaš, muhto oallugat jurddašit ahte gal dat manná bures go vulget sihkkelastit, lohká Trømborg. 

Buohkain galggašii jealbma

Olbmuin leat iešguđetge čilgehusat manin eai geavat oaivesuoji go sihkkelastet. Njealjis lohkásis muitalit ahte eai geavat jealmma danin go sihkkelastet dušše oanehis mátkkiid, ja dat lea ge dábáleamos ágga. 

– Oanehis mátkkit sáhttet seamma váralaččat go guhkebuš mátkkit. Mii han gal geavahit biilaboahkána go vuodjit oanehis gaskkaid, ja de galggašii geavahit jealmma oanehis sihkkeltuvrrain. Oaivesuodji han lea hálbbes dáhkádus ja sáhttá gáhttet olbmo heahkka jus lihkohisvuohta deaivida. Jahkásaččat dáhpáhuvvet olu lihkohisvuođat main sihkkelastit bávččagahttet oaivvi bahuid, ja daid sáhtašeimmet eastadit jealbmageavahemiin, lohká Tryg dáhkádusfitnodaga gulahallanráđđeaddi Torbjøn Brandeggen preassadieđáhusas. 

28 proseantta sihkkelastiin ii oba leat ge jealbma, čájeha guorahallan. Dát lea dábáleamos 40-49 ahkeluohkás mas juohke njealját dadjá ahte ii suddje oaivvi danin go sus ii leat sihkkeljealbma. 

– Dat lea beare heittot. Jus olbmos lea sihkkel, de berre maid skáhput jealmma ja geavahit dan, loahpaha Trygg Trafikk gulahallanhoavda Ingrid Trømborg. 

-Almmuhus-