-Almmuhus-
-Almmuhus-
-Almmuhus-
OĐĐASATDušše badjelaš bealli gásttašuvvojit girkus

Dušše badjelaš bealli gásttašuvvojit girkus

-

-

Eai goassege ovdal leat nu unnán mánát gástašuvvon Norgga girkus go dál.

Gástalogut, konfirmašuvdnalogut ja miellahtut Norgga girkus njidjet. Diibmá gásttašuvvojedje girkus dušše 58,9 proseantta mánáin geat riegádedje Norggas. Lohku lea njiedjan 3,1 proseanttain 2013 rájes, čállá Dagen. Konfirmánttalogut ges čájehit ahte 62,5 proseantta Norgga nuorain konfirmerejuvvojedje 2014:s, jagis lea lohku njiedjan 1,1 proseanttain.

 

10 proseanta njiedjan logi jagis

Norgga girku miellahttolohku lea njiedjan 10 proseanttain logi maŋimuš jagis. Seamma áigodagas leat badjel 18 proseantta njuoratmánáidgásttašemiin girkus njiedjan. Jus dáinna lágiin joatkkašuvvá, de eai dáidde viđa jagi geahčen go bealli gásttašuvvot girkus, čájehit Statistihkalaš guovddášdoaimmahaga logut.

 – Logut leat dušše njiedjan dan rájes go risttalašvuohta ásahuvvui Norgii. Gásta lea áidna eaktun beassan girku miellahttun, danin lea dássedit gástalohku dehálaš jus boahtte áiggis galgat sáhttit ain hállat álbmotgirku birra, lohká kirkohistorjjá professor ja searvegottefakultehta rektor Vidar Haanes Dagenii.

 

Eai heađástuva

Oslos gásttašuvvojit vel unnit mánát girkus go muđui Norggas, dušše 27 proseantta njuoratmánáin gásttašuvvojedje girkus diibmá. Norgga bismmačoahkkin registrere gásttaid njiedjama ja oaidná ahte buot girku miellahtut eai ge gásttaš iežaset mánáid girkus.

­ – Mii eat leat heađástuvvan, muhto mii váldit dán duođas. Mii fertet dovddastit ahte álbmot lea eanet seagáš dál go muhtin jagiid áigi, lohká Bismmačoahkkima Helga Haugland Byfuglien.

-Almmuhus-