Romssa ja Finnmárkku fylkkas leat 39 gieldda, muhto 29 gielddas ii leat makkárge plána mo atnit fuola veteránain ja sin bearrašiin.
Norgga suodjalus lea lasihan barggu fuolahit sin geat leamaš olgoriikkas Norgga ovddas ja geat dál máhccet ruoktot.
– Dál lea siviilaservodaga vuorru čuovvolit ja atnit fuola veteránain. Dan sáhttá dahkat iešguđet vugiin, sihke plánaid ja bálvalusa bokte, lohká Romssa ja Finnmárkku sadjásaš stáhtahálddašeaddji Bård Pedersen preassadieđáhusas.
Stáhtahálddašeaddji lágidii digitála čoahkkima veteránaášši birra mannan vahkus. Ledje olu oassálastit, earret eará NAV, NVIO (Norgga veteránalihttu riikkaidgaskasaš operašuvnnaid ovddas), HV16 ja iešguđet gielddaid ovddasteaddjit. Čoahkkimis muitaledje maid veteránat iežaset historjjá.
– Dál orrot birrasii 3000 veterána miehtá fylkka, eatnašat Romssas ja suodjalusgielddain Málárvuomis, Beardus ja Mátta-Várjjagis. Min bargu lea fuolahit ahte buot gielddain lea plána mo sáhttet veahkehit veteránaid ja sin bearrašiid, lohká Pedersen.
Ovttasbargu gielddaid gaskka
Son muitala ahte olu gielddat ovttasbarget plánaiguin, ja olu eará gielddat árvvoštallet dahkat dan seamma. Dehálamos lea ahte čuovvolit plána. Veteránaplánas galget leat doaimmat mat árvvusatnet ja áimmahuššet veterána oktan bearrašiin. Plánas sáhttet maid leat dearvvašvuođabálvalusat, iešguđet fálaldagat ja plánat mo loktet sin árvvu servodagas.
