Báikeolbmot leat fas gávdnan jápmán luosaid mat leat dávdii jápmán Badjedurdnosis.
Badjedurdnosa ja Pello gaskka, Juokseŋgi nammasaš báikkis Durtnoseanus, leat vuot báikeolbmot gávdnan olu hávváduvvon ja jápmán luosaid, čállá SVT.se. Lussii lea fas njommon dávda mii goddá luosaid.
– Ovdal vahkuloahpa gávnnaimet 20 luosa básheakkas dán mohkis. Lea nu váivi ahte measta čirron, lohká Leif Taavola, gii ássá Juoksengi gilážis.
Duortnoseatnu lea Mearrabađaluovtta dehálamos luossajohka. Guhtta jagi dás ovdalis fuomášedje olbmot vuosttaš geardde hávváduvvon ja jápmán luosaid Duortnoseanus. Vaikko Stáhta šibitdoavttirmedisiinnalaš lea olu dutkan ášši, de eai leat nagodan fuomášit siva manin luossa buohccá ja jápmá. Muhtumin lea luosas maid skáidnejuvvon hávit. Analiissat mat dahkkojedje moatti jagi dás ovdalis luosas, čujuhedje birasmirkkuide.
– Luossa jávká jus mii eat gávnna siva dáid háviide, lohká Leif Taavola.
Son oaivvilda Ruoŧŧa ja Suopma berrešedje ovttasráđiid čoavdit rádjajoga ášši.
– Riikkat berrešedje dutkat luosa gos gorgŋe etnui go vuodjala gođđanbáikkiide. Lea juoidá mii dáhpáhuvvá lussii dan gaskkas go vuodjá bajás, oaivvilda Leif Taavola.
