Guovdageainnu Bargiidbellodat doalai jahkečoahkkima mannan vahkkus. Diimmá rájes lea bellodaga miellahttulohku duppalaston.
Guovdageainnu Bargiidbellodat doalai jahkečoahkkima mannan vahkkus. Diimmá rájes lea bellodaga miellahttulohku duppalaston.
Guovdageainnu Bargiidbellodat doalai jahkečoahkkima ođđajagimánu 27. beaivvi, gos válljejedje ođđa stivrra.
Joatká jođiheaddjin
Per Nils Saari joatká jođiheaddjin ja Mikkel Ailo Gaup válljejuvvui ges ođđa nubbinjođiheaddjin. Maiddái Inger Marit Bongo válljejuvvui fas čállin, Nils Johan Gaup ges rehketdoallin ja Anne Berit Skum ges stivrralahttun. Ođđa stivrralahttu lea Ellen H. Buljo.
Stivii besse maid Guovdageainnu AUF jođiheaddji Ulrika Snowdon, suohkanstivrra joavkojođiheaddji Isak Mathis Buljo ja sátnejođiheaddji Johan Vasara.
Duppalastán miellahttulogo
Jahkečoahkkimii bohte birrasiid 30 miellahttu.
– Guovdageainnu Bargiidbellodat lea duppalastán miellahttulogu ovddit jahkečoahkkima rájes, čállá čálli Inger Marit Bongo preassadieđáhusas.
Muđuid lea maid ođas dat go Guovdageainnu AUF (Bargiidbellodaga nuoraidsearvi) lea vuođđuduvvon.
– Nuorat vuhttojedje bures jahkečoahkkimis ja ovddidedje iežaset váibmoáššiid, čállá Bongo.
