-Almmuhus-
OĐĐASATDuorastaga álgá diggi gos dievdu lea áššás­kuhtton doaruhan nisson­olbmo

Duorastaga álgá diggi gos dievdu lea áššás­kuhtton doaruhan nisson­olbmo

-

-

Sis-Finnmárkku dievdu lea áššáskuhtton go galgá diibmá doaruhan nissonolbmo muhtun priváhta viesus Romssas. Dievdu lea viggan oažžut nissonolbmo geassit guoddalusa.

Dievdu gálga diibmá suoidnemánus doaruhan nissonolbmo Romssas. Nissonolmmoš fertii goaruhit vihtta sákkaldaga go šattai hávvi oaivái, maŋŋel go dievdu galgá leat časkán, čiekčan ja dearpalan nissonolbmo oaivvi seainni njeaiga. Dievdu galgá maid hoigadan nissonolbmo tráhpa vulos.

Nissonolbmo veahkkeadvokáhtta Ingunn Greve Tøllefsen ii hálit olu kommenteret ášši birra.

– Áidna maid sáhtán kommenteret lea ahte mu klieanta doahttala dan maid diggegoddi árvvoštallá, ja son vuordá geargat áššiin, dadjá Tøllefsen.

Heaitit bohccuiguin bargame

Dievdu galgá čállán teakstadieđu borgemánus seamma jagi, vaikko dievddus lei guosse- ja oktavuođagielddus nissoniin mánu ovdal. Teakstadieđus čuoččui ahte dievddus lea filbma nissonolbmos, ja jus dievdu čájeha dan politiijaide, de sáhttá dat buktit nissonolbmui váttisvuođaid. Dievdu galgá maid geahččalan váikkuhit dan seamma teakstadieđu bokte oažžut nissonolbmo geassit guoddalusa, ja čálii maid ahte jus dievdu dubmejuvvo, de son ferte heaitit bohccuiguin bargamis.

Dievddu advokáhtta Per-Ellef Krokan muitala su klieanta ii dovddas sivalašvuođa.

– Dievdu ii leat dovddastan sivalašvuođa ii ge dovddas dahkan dan mii čuožžu áššáskuhttinmearrádusas. Dat dieđusge mearkkaša ahte son vuordá áššehuvvat. Mii fertet oaidnit diggegotti bohtosa, dadjá Krokan.

Áitán nissonolbmo

Romssa ja Finnmárkku stáhtaadvokáhtaid áššáskuhttina mielde ii leat suoidnemánu dáhpáhus vuosttaš geardde go dievdu lea doaruhan nissonolbmo. Diimmá ođđajagimánus galgá dievdu maid nihttán nissonolbmo čugget gáffaliin, čuohppat suorpmaid eret dahje goddit su.

Dievdu lea áššáskuhtán rihkkon ráŋggáštuslága paragráfa 273, 157, 271, 263 ja 168.

-Almmuhus-