-Almmuhus-
OĐĐASATDuopmu celkon boazosuola­áššis

Duopmu celkon boazosuola­áššis

-

-

Sis- ja Nuorta-Finnmárkku diggegoddi leat dál cealkán duomu boazosuolaáššis.

40-jahkásaš dievdu lei áššáskuhtton suoli njuovvan «Skoalbmi» nammasaš hearggi, mii ii lean su. Dikkis gáibidii gillájeaddji lahka miljovdnabeale ruvnno buhtadussan hearggi ovddas.

Sis- ja Nuorta-Finnmárkku diggegoddi meannudii ášši guovvamánu álggus, ja guovvamánu 17. beaivvi celkui duopmu áššis.

Áššáskuhtton dievdu dubmehalai dan hearggi njuovvan, ja oaččui evttolaš giddagasduomu, 21 beaivvi, mas geahččalanáigi lea guokte jagi. Dasa lassin son gártá 25 000 ruvnno máksit heargeeaiggádii. Loahpas vel šaddá máksit 4000 ruvdnosaš áššegoluid.

Loga maid:
Suola­ášši dikkis: Seamma bohcco oaivi, vai ii?

Ášši duogáš

Lei ge skábmanu 17. beaivvi 2019:s go Kárášjoga nissona vuodjenhearggi GPS-čeabetbáddi heittii doaibmamis. Go son manai báikái gos maŋemus lei sádden GPS-dieđuid čeabetbáddi, doppe son de gávnnai njuovvansaji.

Seamma beaivvi čájehuvvo maid ahte 40-jahkásaš dubmehallan dievdu lea leamašan seamma guovllus ja njuovvan bohcco. Son čilgii ahte son lea alcces niestebohcco njuovvan alddis. Dan bohccos son rohttii čoavjji eret, heŋgii skutera maŋŋái ja geasehii vulos luoddagurrii. Dan niestebohcco son de muitala vuovdán muhtun eará olbmui.

Namuhuvvon oaivi, man áktor anii duođaštussan dikkis, dat šattai ge hui guovddáš duođaštussan áššis.

Áššis lea guokte vahku guoddalanáigi dan rájes go duopmu lea addon diehtun dubmehallan divdui.

-Almmuhus-