Bargiidbellodaga sámediggejoavkku parlamentáralaš jođiheaddji, Ronny Wilhelmsen, lea duhtavaš Alimusrievtti duomuin Unjárgga gilisearvvi ja Finnmárkkuopmodaga (FeFo) áššis.
Ovttajienalaš Alimusriekti celkkii bearjadaga ahte Finnmárkkuopmodagas lea riekti hálddašit meahcceriggodagaid Unjárggas Finnmárkkus, ja ahte báikkiolbmuin leat geavahanvuoigatvuođat guhkesáiggi geavaheami vuođul.
Hálddašit min oktasaš riggodagaid
Wilhelmsen oaivvilda ahte duomu eavttut ja loahppaboađus addet rievttes gova das mot meahcceriggodagaid hálddašeapmi berre leat Finnmárkkus.
– Vaikko Unjárgii ii mieđihuvvon riekti hálddašit iežas guovlluid, de duomus leat báikki olbmuide nannejuvvon sin geavahanvuoigatvuođat iešheanalis vuođu alde. Dáid geavahannjuolggadusaid galgá FeFo hálddašit, ja áiggi vuollái nanne dat FeFo orgánan mii galgá hálddašit min oktasaš riggodagaid ceavzilis lági mielde, ja sihkkarastit sámi vuoigatvuođaid Finnmárkolága bokte, dadjá Wilhelmsen preassadieđáhusas.
Álggahit gulahallama báikeolbmuiguin
Son oaivvilda Alimusrievtti boađus maid sádde dehálaš signála. FeFo ferte farggamusat álggahit gulahallama báikeolbmuiguin ja ráhkadit njuolggadusaid mat doahttalit gártaduvvon geavahanvuoigatvuođaid.
– Mii áigut ávžžuhit sihke FeFo ja vuoigatvuođalaččaid gulahallat konstruktiivvalaččat ja bures dán barggu oktavuođa, cealká Barggiidbellodaga sámediggejoavku preassadieđáhusas.
