Kárášjoga sámiid searvi lea maŋimuš jagiid lágidan moanaid garraduodjekurssaid. Beassážiid áigge beasat oaidnit dujiid maid leat duddjon dáin kurssain.
Beassážiid áigge lágida Kárášjoga Sámiid Searvi ovttas Sámi dáiddaguovddážiin duodječájáhusa, mas beasat oaidnit gárvves dujiid ja govaid bokte oahpásmuvvat duddjoma bargoproseassaide.
Čájáhusa rahpá sámediggepresideanta Silje Karine Muotka. Rahpandilálašvuođas lohká Kirsti Paltto divttaid.
Čájáhusas, man leat gohčodon POP-Up duodječájáhus, beassat oaidnit dáid duojáriid bargguid: Ingrid Steinlein, Kirsi Paltto, Mona Kemi , Ragnhild L. Nystad ja Wenche Bauna
Čájáhusrahpan lea cuoŋománu 9. beaivvi. Maŋemus čájáhusbeaivi dán mánu 24. beaivi. Dán dieđiha Sámi Dáiddaguovddáš preassadieđáhusas.
