-Almmuhus-

OAIVILAT

Dát lea oaivilčálus, cealkámuš, kommentára dahje kronihkka maid ekstearna čálli lea čállán. Čállosis ovddiduvvojit čálli oainnut, guottut ja oaivilat. 

Duohta­vuohta ja soaba­heapmi: – Dieđusge lea sámi servodat gelbbolaš

-

-

Go Sámediggi gieđahalai Duohtavuođa- ja soabahankommišuvnna raportta, válljii Bargiidbellodaga sámediggejoavku hilgut doarjumis dahje evttoheames doaibmabijuid, earret go daid maid kommišuvdna lei evttohan. Ollugat geat oassálaste Sámedikki gulaskuddamiidda ja geat čuvvo Sámedikki dievasčoahkkima viiddes meannudeami, gal várrá imaštalle dan strategiijaválljema.

Manne son Bargiidbellodat háliidii ahte Sámedikkis eai galgan leat makkárge oaivilat dan birra mo dárbbaša njulget dáruiduhttima vahágiid? Manne háliidedje sii badjelgeahččat sámi servodaga 86 gulaskuddanárvalusa oktan ollu dehálaš evttohusaiguin?

Mun maid imaštan, muhto anán iežan menddo buorrin dasa ahte árvádallat. Muhto dan maid mun iežan mielas ferten cuiget, lea vejolaš váikkuhusa. Sidjiide geat eai háliit olus dahkat ášši čuovvuleami oktavuođas, dahje geavahit nu uhccán ruđa go vejolaš ja rievdadit nu uhccán lágaid go vejolaš, gal sáhttá Bargiidbellodaga válljen leat dat gáddjojupmi maid sii leat vuordán.

Dainna ákkain ahte Sámediggi ii sáhte diehtit buorebut go kommišuvdna, sii dovddahedje maiddái ahte sámiin ja buohkain geat serve gulaskuddamii, ii leat gelbbolašvuohta oaivvildit maidege dan birra mo galgá njulget dáruiduhttima vahágiid.

Dieđusge lea sámi servodat gelbbolaš dahkat dakkár árvvoštallamiid. Dat lea Sámedikki eanetlogu vuolggasadjin, ja vuođđun ášši mearrádusaide.

Doaivvun dieđusge ahte Stuorradiggi sáhttá dusttodit mu balu. Seammás ferten dadjat ahte eahpidišgohten go Stuorradikki bearráigeahččan- ja vuođđudanlávdegoddi doalai gulaskuddama cuoŋománu 16. b. raportta birra. Das ledje máŋga áirasa geat bidje stuorra fuomášumi dasa ahte Sámedikkis bohte iešguđet oainnut ovdan.

Áktejuvvon stuorradiggeáirras árvvusatná dieđusge Sámedikki sámiid álbmotválljen orgánan ja sámi álbmotdáhtu sohppojuvvon mearrádusaid.

Jus Stuorradiggi háliida Sámedikki govda eanetlohkui dorvvastit, de sii sáhttet baicce vuhtii váldit Nordkalottfolket joavkku unnitlohkomearrádusa. Dat lea hui ovttalágan eanetlohkomearrádusain, danne go sii válljejedje máŋget stuorra osiid sámediggeráđi evttohusas. Mu mielas gal lei dat ollu eanet ovddasvásttolaš strategiija go Bargiidbellodaga strategiija. Sii han eai leat gal geahččalan duššin dahkat ášši.

Dál fertejit buohkat geain leat vuordámušat doaibmabijuide maŋŋá Duohtavuođa- ja soabahankommišuvnna, luohttit dasa ahte Stuorradiggi váldá ášši duođas ja gieđahallá raportta gudnevuollegašvuođain. Sii berrejit baicce, eai ge nu mo Bb dagai, guldalit sámi servodahkii mii ovddidii iežas oainnuid govda gulaskuddanproseassa vuođul, ja hilgut bovdehusa dahkat nu uhccán go vejolaš.

-Almmuhus-