Sámediggeráđđi ovddida čakčamánus ášši Sámedikki dievasčoahkkimii mas geahčadit geográfalaččat sámi servodaga fálaldagaid.
– Mii leat ráhkadan dilleraportta gos Sámi servodagas gávdnojit ja gos eai gávdno fálaldagat. Dan maid mii oaidnit, mii ii hirpmástuhte, lea ahte leat guovllut gos dáruiduhttinpolitihkka lihkostuvai buoremusat, gos dál váilot olu fálaldagat, dadjá sámediggeráđđi Runar Myrnes Balto (NSR) preassadieđu bokte.
Duohtavuođa- ja soabahankommišuvdna duođaštii movt dáruiduhttinpolitihkka dagahii giella- ja kulturvahágiid, čállá Sámediggi preassadieđus.
Sámedikki dievasčoahkkin gesii raportta ollislaš meannudeamis ovdan ahte lea dárbu ovddidit fálaldagaid báikkálaččat, oassin divodanbarggus maŋŋá dáruiduhttima. Ášši man sámediggeráđđi dál ovddida meannudeapmái, lea boahtte lávki mii galgá konkretiseret dán.
– Mii háliidit ahte Sámediggi galgá bargat dan ala ahte ásahuvvojit fálaldagat eanet báikkiin, dakkár vuogi mielde mii lea vel eanet aktiivvalaš go ovdal. Dát lea ođđa bargovuohki go dat mii lea leamaš dábálaš, mas Sámediggi vuosttažettiin lea dorjon báikkálaš álgagiid. Dáruiduhttima vahágiid buorideapmái soaitá leat liigedárbu ásahusaide ja deaivvadansajiide doppe gos dáruiduhttin lei garraseamos, ovdamearkka dihtii mearrasámiid guovlluin, dadjá sámediggeráđđi Myrnes Balto.
Sierra regionála plánat
Sámediggeráđđi váldá iežas evttohusas ovdan ahte dan ferte dahkat lagaš ovttasbargguin báikegottiiguin, gielddaiguin ja fylkkaiguin. Danne áigot doallat álbmotčoahkkimiid ja ráhkadit sierra regionála plánaid juohke Sámedikki válgabiirii.
– Dat lea áddjás bargu, mii álggahuvvo giđđajahkebealis 2025 ja bistá boahttevaš jagiid, daddjo preassadieđahusas.
Sámediggeáirasat galget meannudit ášši Sámedikki regiovnnalaš čuovvoleapmi Duohtavuođa- ja soabahankommišuvnna raporttas 39. vahkus, dalle go Sámediggi deaivvada lávdegodde- ja dievasčoahkkimiidda Sámedikkis Kárášjogas.
– Buot sápmelaččat geat ásset árbevirolaš sámi guovlluin, berrejit oažžut giella- ja kulturfálaldagaid, sámi deaivvadanbáikkiid ja sámi mánáidgárddiid nu lahka go vejolaš doppe gos sii orrot. Dat lea Sámediggeráđi mihttomearri go mii dál ovddidit ášši regionála čuovvoleami birra Duohtavuođa- ja soabahankommišuvnna raporttas, dadjá sámediggepresideanta Silje Karine Muotka (NSR) ášši oktavuođas.
