Dán vahkus finadii Suoma riekteministtar, Anna-Maja Henriksson, Sámedikkis Anáris gos earret eará duohtavuođa- ja soabadankomišuvdna digaštallui.
Duohtavuođa- ja soabadankomišuvnna bargguid olis leat dál álggahan álbmotgulaskuddamiid. Kommišuvnna ságadoalli, Hannele Pokka lohká okta jagi lea beare unnán áigi gulaskuddamiid čađaheapmái.
– Ii ná duođalaš hárjehusain go soabadallamiin sáhte hohpohallat. Norgga bealde soabadallan válddii vihtta jagi, gal miige dárbbašat eanet go ovtta. Ovddit jahki manai iešguđetlágan kriissaide ja eretcealkimiidda, dadjá Pokka Yle Sápmái.
Riekteministtar Henriksson váldá beali dan áššis.
– Soaitá dárbbašuvvon lasseáigi dasa. Deháleamos lea dál dat, ahte bastit bargat vuđolaš barggu. Lea buohkaid ovdu, ahte bargui juolluduvvo doarvái áigi vai šaddá dakkár luohttámuš, maid dát proseassa ánssáša, dadjá Henriksson Yle Sápmái.
Duohtavuođa- ja soabadankommišuvnna barggut álbmotgulaskuddamiin joatkašuvvet 2024 ja 2025 jagiin.
Duogáš
Sámiid duohtavuođa- ja soabadankommišuvdna ásahuvvui stáhtaráđi doaimmas golggotmánu 28. beaivve 2021. Ásaheami maŋŋá kommišuvdna lea doaibman iehčanassii ja iešráđálaččat.
Giđa 2022 áigge duohtavuođa- ja soabadankommišuvdna lea ordnen áššedovdigullamiid, maidda leat bovdejuvvon maiddái Sámedikki ovttaskas virgeolbmot. Sápmelaččaid duohtavuođa- ja soabadankommišuvdna deaivvadii vuosttaš háve Sámedikki stivrrain miessemánus.
