Dán jagi juhket Romssa ja Finnmárkku fylkkasuohkan ja Nordlándda fylkkasuohkan 25,48 miljovnna prošeavttaide mat leat ráđđehusa davviguovlluid politihka vuollásaččat.
Doarjjaortnet Arktisk 2030 guoská Norgga guokte davimus fylkkaide, ja galgá leat mielde váikkuheame guoddevaš servodatovdáneapmái riikkaoasis.
– Dehálaš ahte aktevrrat dihtet ortnega birra
Ovdal lei Olgoriikkadepartemeantta mii hálddašii ortnega ollislaččat, muhto regiovdnaođastusain lea 40% ruđas biddjon Romssa ja Finnmárkku fylkkasuohkanii. Oktiibuot lea 45,48 miljovnna mii galgá doarjut ráđđehusa davviguovlluidpolitihka. 20 miljovnna hálddaša Innovasjon Norge Arktisk, ja galgá mannat fitnodatlaš doaimmaide. Romssa ja Finnmárkku ealáhus ja biras fylkkaráđđi, Karin Eriksen lea movttet go leat ožžon Arktisk 2030 hálddašanovddasvástádusa.
– Dáid ruđaiguin sáhttit duohtandahkat olu buriid prošeavttaid main guoddevaš servodatovdáneapmi davviguovlluin lea guovddážis.
Nordlándda plána- ja ealáhus fylkkaráđđi Linda Helén Haukland lea ovttaoaivilis Erikseniin.
– Lea dehálaš ahte aktevrrat goappaš fylkkain dihtet dán birra ja váldet ávkki ortnegis. Sirddašeapmi riikkaosiin lea dan dihte dehálaš, lasiha son.
Eambbo máhtu álgoálbmogiid dili birra
Ulbmiliin lea ahte doaimmat mat biddjojuvvot johtui earret eará galget váikkuhit ollislaš davviguovlluid perspektiivii, eambbo geavahit ođđaovddiduvvon máhtu ja teknologiija ja oažžut eambbo máhtu álgoálbmogiid dili birra. Ealáhuseallimis (earret eaŋkilfitnodagain), beroštusorganisašuvnnain, almmolaš aktevrrain ja máhttobirrasiin lea vejolaš ohcat ovdaprošeavttaide ja máŋggajahkásaš strategalaš prošeavttaide doarjaga.
Áŋgiruššansuorggit
Máhttu
Infrastruktuvra
Birasgáhtten, gearggusvuohta ja dálkkádatrievdamat
Ealáhuseallin
