Suohkansuorggis soabadedje ođđa váldotariffašiehtadusa.
Suohkansuorggi searvi KS dieđiha preassadieđáhusas ahte gaskaija disdaga soabadedje KS ja golbma bálkkášiehtadallansearvvit LO suohkan, Unio ja YS suohkan ođđa váldotariffašiehtadusa.
Šiehtadallanjođiheaddji KS bealis bargoeallindirektevra Tor Arne Gangsø lea duđavaš go ovttamielalašvuhtii bohte earenoamáš gáibidahtti dilis Norggas ja suohkansuorggis.
– Suohkansuorggis šattai ollislaš rámma 1,7 proseantta. Lei ovdagihtii hui unnán ruđas sáhka dán jagáš váldotariffašiehtadusas, go 1,6 proseantta lei juo váldon diimmá šiehtadusa dihte ja eará lasihemiid dihte, čállá KS preassadieđáhusas. Lassáneamit leat gaskal 1400 ja 1900 ruvnno NTB dieđuid mielde.
Earret bálkáovttamielalašvuođa, de leat šiehtadusbealit maid ovttaoaivilis ahte loktet gelbbolašvuođa dán tariffaáigodagas ja lasihit ollesáiggbargiid suohkansuorggis.
