Stáhta luonddubearráigeahčču lea duoguštan oktiibuot lobihis 428 fierpmi dán jagi, ja Romssas ja Finnmárkkus buot eanemus.
Stáhta luonddubearráigeahčču lea duoguštan oktiibuot lobihis 428 fierpmi dán jagi, ja Romssas ja Finnmárkkus buot eanemus.
Lobihis luossa-, mearradápmot- ja mearrarávddubivdu sáhttá garrasit váikkuhit jogaid guollenállái, ja Stáhta luonddubearráigeahčču (SNO) lea duoguštan oktiibuot 14 kilomehtera lobihis firpmiid.
– SNO leat lasihan bearráigeahču guovlluin gos váttisvuohta lea stuorámus, muhto mii eat sáhte eará bearráigeahččat unna oasáža min guhkes ja moalkás mearragátti, lohka SNO direktevra Pål Prestrud.
Davvin vearrámus
SNO fierpmeduogušteamit lean unnánit go diibmá, muhto fierpmelohkku lea lassánan.
Eanemus vuorjjahahtti lea ovdáneapmi Hordalánddas ja golmma davimus fylkkain.
Logi duoguštuvvon fierpmis leat gávcci dain guovlluin ja lohkku lea lassánan sihke Hordalánddas Romssas ja Finnmárkkus.
Váttisvuohta lea buot stuorámus Romssas, nu movt lea leamaš maŋemuš logi jagi. Doppe leat SNO duoguštan 141 lobihisfierpmi.
Nubbin eanemus duoguštuvvon fierpmit leat Finnmárkkus, 68 fierpmi, ja Norlánddas 65.
Mihttun jávkadit lobihis bivddu
Prestrud lohká sis lea mihttun jávkadit lobis bivddu, ja jus galget lihkostuvvot dainna, de fertejit bidjat eanet návccaid bissehit vearredahkkiid.
– Mii jáhkkit dat ferte dáhkkot unnidit dákkár biraskriminalitehta, go mii oaidnit ovdamearkkaid ahte lágaid doahttaleapmi lea váilevaš. Orro maid nu ahte oassi dán bivddu duogášágga lea ekonomalaš vuoitun, lohká Prestrud.
Olles náli jávkadit
Son oaivvilda dan go ođđa fierpmit biddjojit seamma sadjái ja leat seamma olbmot mat dáhket dan, dakka maŋŋelaš go SNO lea duoguštan firpmiid.
Lobihisbivdit sáhttet dainna lágiin jávkadit ovtta olles jahkenáli mii lea jođus jogaide gođđit.
Sáhttá lobálaš bivdui čuohcat
– Jus luossanálli ovtta jogas ii gođe doarvái bures de sáhttit šaddat gáržžidit bivddu. Sáhttit šaddat oalát bissehit bivddu dákkáraš jogain. Lobálaš bivduid maid sáhttá váikkuhit, lohká SNO ossodatdirektevra Yngve Svarte.
