Golmma maŋemus vahkku leat duollárat duoguštan birrasii 262 000 tramadol-tableahta mii lea dálkkas mii unnida bákčasiid.
Mánnodaga dahkkui stuora duogušteapmi, go badjelaš 50-jahkásaš dievdu válddahalai duolláriidda go vikkai suoli fievrredit 100 700 tableahta Gardermoenis, čállá VG.
Ođđajagemánu 22. beaivvi bissehuvvui guorbmebiila Svinesundas go das ledje 161 878 tramadol-tableahta.
Narkotihkkan eará riikkain
Dat lea garraseamos dálkkas bákčasiid vuostá Norggas, muhto eará riikkain Eurohpás lea dat dálkkas narkotihkkalisttus.
– Mii oaidnit stuora lassáneami duogušteamis, ja lea ágga várret dan ovdáneami. Go eambbogat jápmet bávččasunnidandálkasiiguin go heroiinnain, de ferte čuvget dán váttisvuođa, čilge duollodirektevra Øystein Børmer. Son gohčoda dan dálkkasgeavaheami epidemiijan ja servvodatváttisvuohtan mii stuorru.
2017:s ožžo birrasii 225 000 norgalačča dakkár dálkasiid doaktáris. Seamma jagi duoguštedje duollárat oktiibuot 288 060 tramadol tableahta. 2016:s ja 2018:s duoguštuvvojedje oktiibuot 20 000 tableahta.
– Logut čájehit ahte leat alla logut tramadol-dálkasiin mat bohtet Norgii. Muhtumin nagodit čuolastit oasážiid dán rávnnjis, ja eará gerddiid ges stuorát osiid, lohká Børmer.
(©NTB)
