Duodjeinstituhta ossodat Kárášjogas mánáid fálaldat dievihii guovtti beaivvis. – Mii fállat nuoraide duodjekurssa maŋŋá basiid, lohká Duodjeinstituhta ossodaga hoavda Heidi Gaup. Geahča govvagalleriija!
Duodjeinstituhta ossodat Kárášjogas mánáid fálaldat dievihii guovtti beaivvis. – Mii fállat nuoraide duodjekurssa maŋŋá basiid, lohká Duodjeinstituhta ossodaga hoavda Heidi Gaup. Geahča govvagalleriija!
Duodjeinstituhtta lágidii duodjebargobáji mánáide gaskal 6-13 jagi Kárášjogas maŋŋebárgga cuoŋománu 11. beaivvi.
Duodjeinstituhtta fálai mánáide boagánkurssa ja čikŋagiehtabáttekurssa.
Olu mánát ohcan
Kurssas leat 25 máná duddjomin gilvui go Ávvir čakŋala sisa.
Sihke oasseváldit boagánkurssas ja giehtabáttekurssas derpet gilvui ja lea hirbmat riedja.
– Ledje hirbmat olu mánát geat ledje ohcan dáid kurssaide. Mu nieida Sara Elen Anna ii beassan giehtabáddekursii go doppe lei dievva, muhto beasai boagánkursii, muitala eadni Sara Marit A. Gaup Eira.
Sara Elen Anne Gaup Eira lea veaháš rahčamin boahkániin ja eadni dolle veahkkin boahkána vai nieiddaš beassá ráigat leairra.
– Mun áiggun rahkadit eambbo ráiggiid dása ja áigun alit ja vilges ivnniid bidjat, čilge gávcci jahkásaš Sara Elen Anne ja čujuha daid alit ja vilges ivnnat ruvddiide mainna nanosmahttá ráiggiid boahkánis.
(Ášši joatká gova vuolábealde)
Kurssa dievihii jođánit
Duodjeinstituhta ossodaga jođiheaddji Kárášjogas, Heidi Gaup, muitala sii lágidit duodjekurssas mánáide ja nuoraide, čalmmustahttin dihtii duoji ja dán láhkai maid addit árvvu duodjái.
– Dál go ráhkadat leairaboahkániid ja giehtabáttiid, de leat geavahan bohcconamahusaid ja adjektiivaid (mat muitalit mo dat lea) maid mánát eai gula beaivválaš gielas nu olu. Hui olu mánáin dás lea gullevašvuohta boazodollui. Lea hui somá, lohká Heidi Gaup.
Kurssas lea dušše moadde gándda ja Gaup čilge kurssat dievihedje nu jođánit.
– Guovtti beaivvis. Mis ii lean eambbosiidda sadji. Mii fállat maŋŋá basiid boagánkurssa ja giehtabáddekurssa nuoraide. Eat leat justa mearridan guđemuš beivviid dat šaddá, čilge Heidi Gaup ja muitala sii almmuhit dan maŋŋil.
Duodjeinstituhta Facebooksiiddus almmuhit ainge kurssaid.
Son muitala Duodjeinstituhta lágidišgoahtá maŋŋá basiid iešguđetlágan kurssaid nugo liidneriessunkurssaid ja nu ain.
(Ášši joatká gova vuolábealde)
Ii leat váttis
Giehtabáddekurssa jođiheaddji Lill Eli Jørgensen Dahl beavddis čohkkájit dievva iešguđet ahkásaš mánát.
Olu mánát leat boahtán fulkkiid lusa dáid beassážiid, nugo oappážat ovcci jahkásaš Celine Teller Sparby ja Erika Teller.
– Lean ráhkadeamen giehtabátti silbaivnnat aluminiumas. Go gearggan dása dearpat bustávaid, de galggan sojahit duon ruovddi birra vai šaddá giehtabáddi. Ii leat váttis, čilge Celine Teller Sparby.
Soai muitaleaba sii áigot leat velá vahkku Kárášjogas ja jurddaš soai leaba beassan vuodjit muohtaskohteriin, dat dat lei hearvá.
Lohkaba soai ássaba Flisa báikkis Mátta-Norggas.
Nuppe beal beavddi ges čohkkába oappážat logi jahkásaš Mio Maria ja 15 jahkásaš Linn Borring.
Soai leaba deike boahtán Linköping gávpogis Ruoŧas. Dál leaba alcceska rahkadeamin giehtabátti.
– Mánát leat čállán giehtabáddái maid háliidit ja herven daid váibmuiguin, liđiiguin, dolggiiguin, násttiiguin ja sárgáiguin. Dál lea muhtumat sojahaddamin giehtabátti vai šaddá iežaset sturrodaga mielde. Dasto ivdnejit daid bustávaid, muitala giehtabáddekurssa jođiheaddji Lill Eli Jørgensen Dahl.
(Ášši joatká gova vuolábealde)
Čállán namahusaid
Guđa jahkásaš Johanne Anti Billington ja ovcci jahkásaš Elise Anti Billington muitaleaba sámegillii maid soai leaba čállán iežaska giehtabáddái.
– Mun lean čállán miessi, áldu ja njiŋŋelas, lohká Elise ja čilge maid dat máksá dárogillii.
– Lea somá ráhkadit, lohká Johanne.
Soai muitaleaba soai ássaba Lommedalenis Mátta-Norggas ja dál leaba dát beassášluomus.
