-Almmuhus-
-Almmuhus-
OĐĐASATDuoddaris buoremus beassášdálki

Duoddaris buoremus beassášdálki

-

-

Dáid beassážiidda eai dieđit dan nu gohčoduvvon «beassášdálkki» Davvi-Norgii. Dušše Finnmárkkuduoddaris šaddá muhtun muddui fiertu ja beaivvádat.

Dat gii lei illudan beassážiid olgun leahkit, ja diktit beaivváža goardit vai áfáiduvvá, ferte dál eará gávdnat masa illuda. 

Meteorologalaš instituhtas eai leat hearvás ságat muitalit beassášdálkki birra. 

 

Borgá máŋga beaivvi

Romssa stádameteorologa Justyna Wodziczko dieđiha ahte beassášvahkku sáhttá olu borgat, go mearas leat borgabalvvat ja biegga sáhttá daid buktit gáddái. Lea dieđihan davvebiekka.

– Eanaš muohtaoavttit bohtet gaskavahkku ja duorastaga, ja bearjadaga iđđes. Dasto heaitá veaháš, ja beaivváš soaitá ihtit, lohká Wodziczko. 

Dát dálki lea dieđihuvvon miehtá Davvi-Norgga, ii ge boađe rievttes fiertu ovdal go biekka jorgala sotnabeaivvi. Dalle lea dieđihuvvon lullebiegga ja de sáhttá firtet ja beaivváš maid ihtit. 

 

– Dálki

– Dan maid lea dehálaš namuhit lea ahte skilleduorastaga boahtá vuollegisdeaddu Oarje-Finnmárkui. Dat dagaha garra orjješdavádat riđu. Lassin bohtet olu muohtaoavttit, mat oktii sáhttet dagahit váttes vuodjinsiivvu. Ávžžuhan olbmuid čuovvut mielde yr.no siiddus ja min Twitterdieđuid, lohká stádameteorologa.

 

Duoddaris čábbámus

Finnmárkkuduoddaris šaddá fiidnámus dálki olles Davvi-Norggas. Borgadálkkit eai olát go duoddara davimus guovlluid, ja muđui Davvi-Norgga. 

– Lulimus guovllut Finnmárkkuduoddaris ožžot oalle buori beassášdálkki, muhtun muddui balvadálki, muhto beaivváš maid báitá, muitala Justyna Wodziczko.

– Šaddá oalle fiertu, muhto ii šatta hirbmat fiinna beassášdálki, lasiha stádameteorologa.

Son dárkkuha ahte lea ain olu eahpesihkarvuohta sin prognosaide, ja ahte sáhttet ain rievdat. 

 

Dieđihan uđđasa

Finnmárkkurittus lea dieđihuvvon njealját ceahki uđasvárra, mii lea alimus ceahkki. 

Varsom.no neahttasiiddus čállet ahte vurdet ahte olu muohtauđđasat firret. 

Rukses Ruossa lea ge váruhan ahte olbmot berrejit vánddardit várrogasat, ja ahte eai bahkke várálaš baikkiide. 

Go lea njealját ceahkki uđasvárra, de mearkkaša ahte lea olu muohta ja biegga mii dagaha eahpesihkkaris dili. Lea hui jáhkehahtti ahte fierrá uđas. Danne lea ávžžuhus čielggas: ale mana ceakkus báikkiide!

– Njealját ceahki uđasvára ferte duođas váldit. Garvve dakkár báikkiid gos sáhttá uđas fierrat, ja erenoamážit gos lea eambbo ceakkus go 30 gráda. Ale vuolgge várremátkkiide, lohká Kjersti Løvik NTB:i Son lea Landsråd Hjelpekorps jođiheaddji. 

 

Ráhkkanan Romssas ja Finnmárkkus. 

Romssas lea Rukses Ruossa nannen bargojoavkku, sis leat golbma uđasfágajođiheaddji. 

– Lea oalle suhkkes borga, ja lea dehálaš leahkit gearggus, lohká Marthe Stokmo NTBi.

Son lea Romssa Rukses Ruossa gearggusvuođaguovddážis.

Finnmárkkus leat maid uđasvára váldán duođas.

– Mii leat bivdán iežamet olbmuid atnit uđasrusttegiid sadjosis, ja biillain, vai eat dárbbaš golahit áiggi duššás, ja daid vuolgit viežžat, lohká Ørjan Olsen NTBii. Son lea Finnmárkku Rukses Ruossa diehtojuohkinguovddážis. 

 

Gidden luottaid

Finnmárkkus leat olu luottat dál juo gitta, uđasvára ja dálkki dihtii. Dan dieđiha Stáda geaidnodoaimmahat dán neahttasiiddus

Olu luottain lea maid ráidovuodjin, dálkki dihtii. 

-Almmuhus-