Sápmelaš lámisolbmot eai oaččo dan veahki mii lea geatnegahtton lágalaččat.
Sápmelaš lámisolbmot eai oaččo dan veahki mii lea geatnegahtton lágalaččat.
Dát duođaštuvvo njeallje jagi dutkanprošeavttas man loahpalaš bohtosiid almmuhit stuorra konfereanssas Álttás skábmamánu 9. beaivvi.
Vuosttaš gearddi dutkan
Preassadieđáhusas čállet konferánssa lágideaddjit ahte lea erenoamáš prošeakta mii dál gárvána go leat vuohččan guorahallan sápmelaš lámisolbmuid dili, sihke Ruoŧas, Norggas ja Suomas.
Leat jearran leat go lámis sápmelaččain seamma buorit eavttut eallindilis go muđui dáža álbmogis leat.
Norgga Mánáid-, nuoraid- ja bearašdirektoráhtta (Bufdir) lea diŋgon dán prošeavtta, man jođiha Davviriikkaid ministtarráđi vuollásaš ásahus, Davviriikkaid buresbirgejupmeguovddáš.
Guokte duktama almmuhit
Oktiibuot vihtta dutkama čađahuvvojit ja guokte almmuhit konferánssas.
Okta gullá Norgga beallái ja nubbi fas Suoma beallái. Mihttun lea álgoálbmot perspektiivvas čuovvolahttit rávvagiid mat leat ON konvenšuvnnas lámisolbmuid vuoigatvuođain.
– Erenoamážin lea ahte buot dutkamiin leat ovttalágan bohtosat, ahte buot golmma riikkas leat seamma heajos eavttut bálvalettiin sápmelaš lámisolbmuid, vaikko sis galggaše leat vuođđovuoigatvuođat dasa. Okta ovdamearkan leat giellaeavttut. Lámisolbmuide eai dáhkit, eai ge fála dieđuid iežaset gillii. Nubbi eará boađus duođašta man dehálaš sihke kultuvrralaš ja lagašolbmuid gullevašvuohta lea. Sohka- ja bearašgullevašvuohta addá ceavzinfámuid árgabeaivvis, go majoritehta servodaga almmolaš ásahusain lea váilevaš doarjja, čállet preassadieđáhusas.
– Bálggesčuolli
Jonas Bergström, gii jođiha lámisolbmuid ossodaga Davviriikkaid buresbirgejupmeguovddážis, dadjá ná:
– Mun gohčodan dán prošeavtta erenoamážin dahje bálggesčuollin. Lea vuosttas geardi go áibbas ođđa dieđuid almmuhit dán suorggis. Bohtosiid leat kárten viidát, máŋgga guovllus Sámis. Dát ođđa dieđut dagahit dárbbašlažžan buoridit fálaldagaid sápmelaš geavaheddjiide, lohká son preassadieđáhusas.
