Finnmárkku politiijaguovllu operašuvdnajođiheaddji, John-Kåre Olsen, sáhttá duođaštit ahte lea leamaš duođalaš biilalihkohisvuohta Máze ja Gievdneguoikka gaskka, dál maŋŋelgaskabeaivve. Okta olmmoš lea duššan.
Guokte biilla leat seaguhuvvon lihkuhisvuhtii. Nubbi lea personbiila ja nubbi ges betoŋŋabiila.
– Olbmot roasmmohuvvan
Politiijat muitaledje árabut odne maŋŋelgaskabeaivvi ahte olbmot leat roasmmohuvvan ja biillat leat roakčanan.
Dál duođaštit politiijat NTB:i ahte okta olmmoš lea duššan.
– Mii leat dql bargame identifiseret olbmo ja dieđihit oapmehaččaide, lohká Olsen NTB:i.
Politiijat eai háliit eambbo kommenteret áššái ovdal go dihtet eambbo. Politiijain ii leat vuos áibbas čielga govva lihkohisvuođas. Lihkohisvuođa báikkis leat politiijat, buollinčáskadeaddjit ja ambulánsa.
NTB:i lohká Olsen ahte eai dieđe manne lihkuhisvuohta lea deaividan.
– Mii diehtit nubbi biila lea vuodján badjel luotta. Politiijat barget dál lihkuhisvuođabáikkis, lohká Olsen.
Gidden geainnu
Twitteris dieđiha geaidnodoaimmahat ahte davá beale Gievdneguoikka luoddaearu, lea E45 luodda giddejuvvon lihkohisvuođa geažil. Garvindihte lihkuhisvuođabáikki de ferte vuodjit Kárášjoga ja Leavnnja bokte.
Olsen árvvoštallá geainnu leat gitta máŋga diimmu.
Ávvir čuovvula ášši.
Anne Berit Anti
