Odne iđđedis vujii muhtin biila badjelgeainnu Idjajávrris, moadde miilla davábealde Kárášjoga.
Finnmárkku politiijaguovllu nuorttabeale operašuvdnajođiheaddji Torfinn Halvari muitala iežaset ožžon dieđu lihkohisvuođas diibmu 08.28.
– Dalle bođii trippeldiehtu AMK-guovddážis, gos gohččo sihke politiijaid, buollinčaskadeddjiid ja ambulánssa báikái. Dieđus bođii ovdan ahte okta biila lea vuodján badjel geainnu, muitala Halvari.
Garrasit roasmmehuvvan
Politiijat jovde báikái diibmu 08.42. Seaking ambulánsahelikopter lea maid joavdan báikái.
– Biillas ledje guovttis, okta nisu ja okta almmái. Goappašagat leaba roasmmehuvvan, nubbi garrasit ja nuppi eat dieđe man garrasit lea roasmmehuvvan, muitala Halvari.
Halvari ii loga diehtit roasmmehuvvan olbmuid agi.
– Nubbi ainjuo lea norgalaš, muitala son.
Ávvira reportár báikkis, muitala biilla leat oalle ládje roakčanan. Helikopter lea dál viežžan olbmo ja girdilan eret báikkis.
