Duiskii oažžut divššu

Ođđajagimánus oaččui Berit Hætta dieđu ahte sus lea borasdávda čoalis mii lei leavvan vuoivasii ja vuollevuvdii. Doaktárat adde dieđu Berit Hættai ahte son ii boađe ceavzit, ja ahte sus ii leat šat eará sullii okta ja bealle jáhkki vel. Dat ii lean Berit Hætta olbmá, Katy Hansena mielas dohkálaš ja danne son ráhkadii ge joavkku «Facebook» nammasaš neahttasiiddus gos son álggi čoaggit ruđaid nu ahte Berit Hætta beassá vuolgit Duiskii oažžut divššu. Dál leaba Berit Hætta ja Katy Hansen čoaggán badjelaš 130.000 ruvnno ja álgiba oaidnit čuovgga sevdnjes tunneallas.

Son lea mu eŋgel

Ikte bođii diehtu Duiskka doaktáris Dr. Herzorg gii lohká iežat sáhttit dikšut Hætta iežat buohcciviesus. Dat diehtu lea addán movtta borasdávda buohccái Berit Hættai.

— Mun lean dal nu movttet ii leat leaika. Jus mus ii livččii mu buorre olmmái, Katy de in livččii šat nagodit maide maŋŋel go ožžon dieđu doaktáriin ahte mus ii leat šat nu guhká. Mun livččii oalát vuollánan su haga. Mun livččen njulgestaga velohallan ja vuordán dassái go gearggan. Son lea mu eŋgel, lohká Hætta iežat buori olbmá birra.

Vuolgga boahtte vahkku

Boahtte vahkku lea sus plána vuolgit olgoriikii oažžut divššu gos son galgá golbma vahkku leat. Dohko son váldá iežat olbmá, Katy Hansena fárrui gii lea áŋgirit čoaggán ruđa.

— Duiskka doaktárat galget vuos mearridit galggan go dáppe váldit vel ovtta seallamirkkudálkasa, ovdal dieđan áibbas sihkkarit goas vuolggan dohko. Muhto mun illudan, ja mun sávan ahte addet munnje dakkár divššu nu ahte ealán guhkit go ovtta jagi. Buot eanemus sávan dieđusge ahte duiska doaktárat nagodit goddit borasdávdda áibbas, muhto in dette duosta bearehaga sávvat. Viisot guhkit go ovtta jagi lea positiivvalaš, muitala Hætta.

— Mus okta olmmái logai munnje oktii «Vår herre har en plan for deg» ja dan lean mun vuhtiiváldán, lohká Hætta ja šuohkiha.

Rievdadan borrandáhpi

Dat dikšu maid fallet Duiskkas lea «hypertermi» dikšu, dat galgá ligget borasdávddašattalmasa, go dat ii gierdda lieggasa nu bures. Dat maid ligge olles goruda, muhto doaktárat jáhkket ahte Berit Hætta gierdá dan. Son maid galgá oažžut ollu eará divššuid olgoriikkas maid ii leat vejolaš oažžut Norggas.

— Mun lean maid heaitán borramis sohkkara ja karbohydráhtaid, dan mun dagan dan dihtii go borasdávda liiko sohkkarii ja karbohydráhta. Mun boran dušše bierggu, guoli moni ja dakkár dearvvašlaš biepmuid, ja mun dovddan ahte lean mihá eambbo lášmat dál go ovdal, čilge Hætta.

Giitevaš

«Facebook» siiddus maid Berit Hætta olmmái lea rahkadan, leat ollu olbmot miellahtut geat áigot veahkehit su čoaggit ruđa. Eanaš olbmot leat eret dan báikkis gos Berit Hætta ieš lea eret, Guovdageainnus.

— Lihkkus mus leat nu ollu buori olbmot ja olbmát mu birra. Maŋŋel go šadden buohcci de leat nu oallugat čájehan beroštumi ja veahkehallan mu juohke ládje. Olbmot geaiguin in leat goasse hupmat leat maid čájehan beroštumi. Guovdageaidnulaččain lean mun ožžon erenoamáš doarjju, dat lea nu somá oaidnit ahte olbmot beroštit, lohká vel Hætta loahpas.

^{_{Berit Hætta, «Viddas Datter».  Priváhtagovva.}}