-Almmuhus-
-Almmuhus-
OĐĐASAT Duhta­vaš Stuora­dikki ealáhus­ovdánahttin­dieđáhusain

Duhta­vaš Stuora­dikki ealáhus­ovdánahttin­dieđáhusain

-

-

Sámediggi lea duhtavaš Stuorradikki dieđáhusain mo ovdánahttit sámi báikegottiid ja báikkálaš dási ealáhusaid.

Gaskavahku almmuha stáhtaráđđi, Linda Hofstad Helleland, gielda- ja ođasmahttindepartemeanttas stuorradiggedieđáhusa sámi báikkálašservodaga ealáhusvuođus. Dieđáhus lea erenoamáš ovttasbargu Gielda- ja ođasmahttindepartemeantta ja Sámedikki gaskkas.

– Dán áššis lea leamaš departemeanttas ja Sámedikkis ovttasbargu, muhto mii fertet mieđihit ahte eat leat gávdnan čovdosiid dain váttis áššiin, numo sisabahkkemiid ektui. Dat guoská bieggamilluide, ruvkedoaimmaide ja go áigot mearrasámi guovllu merrii vurket ruvkebázahusaid, lohká sámediggeráđđi Silje Karine Muotka (NSR) preassadieđáhusas.

– Buorre ovttasbargu ja gulahallan|

Sámediggi vásiha ahte dán jagáš dieđáhusain lea leamaš buorre ovttasbargu ja gulahallan, eanet go ovddit jagiid. Sámediggeráđi lohká ge dan buori ovttasbarggu vuohttit dieđáhusas:

– Dieđáhusas čilgejuvvojit buorit ovdánahttindoaimmat sámi guovlluin, mo árbevierut ja innovašuvdna leat oassin sámi ealáhusaid ovdáneamis. Čilgejuvvo maiddái mo sámi kultuvra ja kulturárbi lea vuođđun ođđa ealáhusain, ja seammás de maid čilget mat leat min guovllu hástalusat, dadjá Muotka.

Sámi guovlluid earenoamáš hástalusat

Dieđáhusas čilgejit makkár erenoamáš hástalusat leat sámi guovlluin leat stuorát čoahkkebáikkiid ektui.  Sámediggeráđđi namuha ovdamearkan ahte márkan lea unnit ja leat guhkes gaskkat. Infrastruktuvra ii leat seamma bures ovdánan ja johtalusfálaldagat leat heajubut. Dat heađušta mobilitehta. Ruhtaháhkan lea heajut ja dat váikkuha investeremiidda.

– Oidnet dárbbu ásahit eambbo foanddaid

Stuorradiggedieđáhusas árvaluvvo maid investerenfoanda Davvi-Norgii, mii maid lea namuhuvvon davviguovlludieđáhusas ja mii lea vuđolit guorahallon davviguovllufierpmádagain, mas sihke Sámediggi, departemeanttat ja davimus fylkkat oassálastet.

– Lea illudahtti oaidnit ahte ráđđehus oaidná dárbbu ásahit eambbo foanddaid Davvi-Norgii, ja seammás oaidná Sámediggi maid dárbbu ásahit foandda mii lea heivehuvvon guoddevaš ealáhusovdáneapmái álgoálbmotguovlluin, dadjá Muotka.

Dieđáhus almmuhuvvo Snåases gaskavahku.

-Almmuhus-