-Almmuhus-
OĐĐASATDuhtavaš go sáme­dikkis áiggoše čielggadit maid ieža oaivvildit giđđa­loddema birra 

Duhtavaš go sáme­dikkis áiggoše čielggadit maid ieža oaivvildit giđđa­loddema birra 

-

-

Johan Henrik Buljo lohká duohtan dan maid Sámediggi ieš lea vuohttán, ahte olbmot leat eahpidišgoahtán maid Sámediggi duođas oaivvilda dálá giđđaloddenregulerema birra.

Sámedikki ođđa áššiid dieđiheamis lea NSR-áirras Sandra Andersen Eira evttohan ahte lea áigi geahčadit Sámedikki prinsihpalaš oainnu dása.  Andersen Eira čállá evttohusas ahte Sámediggi vuohttá ahte olbmot leat eahpidišgoahtán maid Sámediggi duođas oaivvilda dálá regulerema birra giđđaloddenáššis.

– Sámedikki mielas dálá reguleren lea eahpitkeahttá sámi sajáiduvvan vieruid vuostá ja álgoálbmot- ja olmmošvuoigatvuođaid vuostá. Sámediggi čujuha ahte Sámedikki cealkámušain, go juo lea ovddasteaddji orgána Norgga sápmelaččaide, lea rievttalaš mearkkašupmi Norgga láhkavuođđudusas, čállá Andersen Eira iežas evttohusas. 

– Buorre vuolggasadji

Giđđalodden lea boares árbevierru ja dološ vierru Guovdageainnus. Ja olles sámi álbmogis leat čavges kultuvrralaš čanastagat loddemii. 

Guovdageainnu suohkana loddenlávdegotti jođiheaddji Johan Henrik Buljo mielas lea buorre go Sámedikki prinsihpalaš oaidnu loddemii evttohuvvo ođđa áššin. 

– Dat lea hui buorre vuolggasadji go geahčadit, digaštallet ja váldet ovdan dan, dat lea mu vuosttaš reakšuvdna dasa. 

EVTTOHA: Sámediggeáirras Sandra Andersen Eira evttoha loddema ođđa áššin.
EVTTOHA: Sámediggeáirras Sandra Andersen Eira evttoha loddema ođđa áššin.

Duohta ahte eahpidišgohtet

Buljo lohká duohtan dan maid Sámediggi lea vuohttán, ahte olbmot leat eahpidišgoahtán maid Sámediggi duođas oaivvilda dálá regulerema birra giđđaloddenáššis. 

– Dat gal lea hui duohta maid sii leat fuobmán. Olbmot leat eahpesihkkarat maid Sámedikkis oaivvildit sihke loddema ja maid eará áššiid birra. Mu mielas lea Sámedikki, ja maid fylkkapolitihkkáriid bealis eambbo digaštallan loddema birra ja FeFo ja politihkkárat čájehit eambbo beroštumi, mii gal lea hui positiiva, dadjá Buljo. 

Bargame áššiin

Sámediggi čujuha ahte sihke Guovdageainnu suohkana giđđaloddenlávdegoddi ja loddensearvi Boarri leat árvvoštallamin movt dálá regulerema sáhttá heivehit sámi riekteipmárdusa mielde ja sajáiduvvan vieruid mielde.

– Sámediggi áigu dán sámediggeáigodagas ovddidit ášši mas giđđalodden lea oassin áššis, čuožžu Andersen Eira evttohusas. 

Loddenlávdegoddi lea bargame olles leavttuin čohkket dieđuid ja čállit raportta loddema birra

– Eat leat duhtavaččat ovdal go beassat loddet nu ahte beassat gohčodit loddemin. Eat mii gáibit čuđiid mielde lottiid báhčit, muhto buriid mállásiid ja návddašit bivddu. Galgá fas suohtas vuolgit meahccái ja jávregáddái, dadjá loddenlávdegotti jođiheaddji. 

– Sámediggi deattuha ahte sámi sajáiduvvan vieruin lea nana suddjen álgoálbmot- ja olmmošvuoigatvuođaid bokte. Sámediggi vuhtii váldá ahte lea dárbu reguleret giđđaloddema, muhto Sámedikki mielas dálá reguleren gaskaboddosaš láhkaásahusa mielde áigodahkii 2013-2022 ii vuhtii váldde sámi dološ vieru maid giđđalodden ovddasta, čállá Andersen Eira. 

Ávvir ii lihkostuvvan oažžut Sandra Andersen Eira ságaide ovdal go ášši almmuhuvvui. 

-Almmuhus-