-Almmuhus-
OĐĐASATVuoruhii vuosttažin ja oaččui

Vuoruhii vuosttažin ja oaččui

-

-

Nils Henrik Gaup Kárášjogas oaččui fas, goalmmát jagi maŋŋálaga, bivdoguovllu máid lei vuoruhan bajimussii. 

Go Kárášjoga ealgabivdiidsearvi almmuhii ealgabivdoguovlluid Kárášjoga servodatviesus bearjadaga de eai lean go 18 geahčči boahtán, muhto muhtimat sis gal šadde duhtavaččat. 

Okta sis gii lei duhtavaš go bivdoguovlu almmuhuvvui lei Nils Henrik Gaup. Son lei boahtán servodatvissui čuovvut almmuheami ja sus lei lihkku, nu go ovddit jagiid ge lea leamaš. 

– Goalmmát jagi maŋŋálaga oaččuimet dan bivdoguovllu máid leimmet vuoruhan vuosttažin. Dál lea hui buorre dovdu, muitala Gaup gii ovdagihtii jo dajai ahte Báhkkilvárri lea su bivdoguovlu. 

Son muitala ahte ágga manne vuoruhii Báhkkilvári bajimussii lei dat go dohko lea álki ja lahka mannat. 

– Doppe sáhtte vuojistit maŋŋel barggu maid jus háliida bivdit, dadjá son. 

Eanemus ohccit

Kárášjoga bivdoguovlu Njárgasaš lei dat bivdoguovlu man buot eanemus joavkkut Finnmárkkus ledje vuoruhan iežaset listui. Servodatviesus lei jaskat go Njárgasaš iđii šerbmii, ja go olbmot fuobmájedje ahte lea Kárášjoga bivdojoavku mii lea ožžon bivdoguovllu de gal šattai riedja. 

Kárášjohkalaš Tor Georg Næss ja su bivdojoavku dat besset bivdit bivdoguovllus man buot eanemus joavkkut ledje vuoruhan, ja Næss muitala ge ahte son lea oahpis doppe. 

– Diibmá lei mu vieljas, Arvidis, dat bivdoguovlu, ja mu stuora viellja Halfdan orru dan bivdoguovllu siskkobealde. Mun in leat gal goassege bivdán doppe ovdal, vaikko lean gal hui oahpis guvlui, muitala Næss ja illuda čakčii go ealgabivdu lea su mielas fiinna čakčadoaibma masa juohke jagi illuda. 

Dáppe gávnnat buot Finnmárkku bivdoguovlluid.

DUHTAVAŠ: Tor Georg Næss lei duhtavaš go beassá vuolgit bivdui Njárgasaš bivdoguvlui. Njárgasačča ledje buot eanemus bivdojoavkkut Finnmárkkus vuoruhan. Govva: Roy Arthur Olsen
DUHTAVAŠ: Tor Georg Næss lei duhtavaš go beassá vuolgit bivdui Njárgasaš bivdoguvlui. Njárgasačča ledje buot eanemus bivdojoavkkut Finnmárkkus vuoruhan. Govva: Roy Arthur Olsen

Dušše 18

Ealgabivdosearvi lei rahpan lágiideami 50 olbmui, nu go korona njoammun eastadan njuolggadusat suvvet. Jođiheaddji Jan Idar Somby lei sávvan ahte gártet veaháš eambbo olbmot go 18. 

– Dat lea gal veaháš šállošahtti go eambbo eai leat boahtán, muhto nie han lea dál korona áiggi, mii fertet gillát mii ge. Olbmot leat vuoruhan čuovvut streama ruovttuin, dadjá Somby. 

Guovdageainnus GLR

Guovdageainnus maid láve leat stuora dáhpáhus go bivdoguovllut almmuhuvvojit. Dán jagi lea korona bissehan lágiideami, nu ahte Nils Ole Skum ja Guovdageainnu ealgabivdiidsearvi almmuhedje GLR bokte bivdoguovlluid. 

Skum muitala iežas bargan ollu ja leamaš veaháš balus ovdal almmuheami. 

– Mun in lean nu bures hárjánan rádios hupmat, ja mis ledje hui ollu guldaleaddjit. Mii leimmet ráhkadan sierra plánaid dasa movt bargat ja gaskkohagaid mii riŋgiimet maid guldaleddjiide ja oaččuimet sin mielde sáddagii, muitala Skum ii ge loga veadjemeahttumin dákkár lágiidemiid boahtteáiggis maid. 

– Mun jáhkán ahte mis šaddá dakkár jahkásaš doaibma dát, muhto de han mis lea vejolašvuohta čohkket olbmuid ja doppe bidjat rádio bokte gullot almmuheami. Ii dat leat nu stuora erohus das čohkkán go mun radiostudios vai dan seamma lanjas gos olbmot leat, dadjá Skum gii ieš beassá Vuoskkobuollan bivdoguovllus bivdit čakčat. 

-Almmuhus-