Sámediggeráđđi Ann-Mari Thomassen lea duhtavaš go giellalávdegoddi čuovvu Sámedikki rávvagiid go guoská bargui gieldaođastusain.
Sámediggeráđđi Ann-Mari Thomassen lea duhtavaš go giellalávdegoddi čuovvu Sámedikki rávvagiid go guoská bargui gieldaođastusain.
– Sámedikki bealis leat mii dadjan ahte sámi giellavuoigatvuođat fertejit nannejuvvot ja guoskat olles ođđa gildii jos gielddat ovttastahttojuvvojit. Mii leat hui ilus go giellalávdegoddi doarju min oainnu dás, dadjá sámediggeráđđi Ann-Mari Thomassen.
Dehálaš nannet ja suodjalit
Oasseraporta čájeha ahte giellalávdegoddái lea deaŧalaš nannet ja suodjalit sámegiela maiddái maŋŋá gielddaid ovttastahttima, ja ahte sámegiela suodjaleami vuhtii váldin ferte leat mielde gielddaid vejolaš ovttastahttima ollislaš árvvoštallamis.
Sámegiella ja dárogiella ovttaárvosaččat
Dasto oaivvilda ráđđelahttu Ann-Mari Thomassen ahte lea gelddolaš go giellalávdegoddi ovddida evttohusa gielddaid hálddašanguovllu dásiid mielde. Dat mearkkaša ahte leat giellasuodjalangielddat gos sámegiella ja dárogiella galget leat ollásit ovttaárvosaččat. Giellaealáskahttingielddat, gos sámegiella galgá nannejuvvot ja ealáskahttojuvvot, ja stuorragávpotgielddat main lea erenoamáš ovddasvástádus sámegielas.
– Mun lean hui movttet
Gieldaođastusa ektui boahtá ovdan giellalávdegotti oasseraporttas ahte giellasuodjalangieldda ii sáhte ovttastahttit giellaealáskahttingielddain vaikko ođđa gielda ollásit sáhtášii gáibádusa mielde leat giellasuodjalangieldan. Seamma guoská jos giellaealáskahttingielda ovttastahttojuvvo gielddain mii ii gula giellaguvlui.
– Mun lean hui movtta go giellalávdegoddi nu čielgasit oaivvilda, ja šaddá gelddolažžan oaidnit movt ráđđehusat čuovvolit giellalávdegotti oasseraportta, dadjá Ann-Mari Thomassen loahpas.
