Mannan vahkkus dárkkistedje 60 guorbmebiilla Geađgeluobbala duollostašuvnnas Norgga ja Suoma rájis. Stáhta geaidnodoaimmahagas leat duhtavaččat go eanaš guorbmebiillat ledje buori ortnegis.
Mannan gaskavahku guorbmebiiladárkkisteames gávdne dárkkisteaddjit guhtta teknihkalaš váilevašvuođa dan 60 guorbmebiillas maid dárkkistedje ja guokte vuoddji oaččuiga várrehusa go leigga rihkkon vuodjin- ja vuoiŋŋastannjuolggadusaid.
– Ledje hui buorit bohtosat. Dárkkisteapmi čájeha ahte sin geaid bisseheimmet atnet ovddasvástádusa iežaset ja earáid sihkarvuođas luottaid alde. Sávvamis leat seamma buorit bohtosat go dálvá, dadjá Stáhta geaidnodoaimmahaga sekšuvdnajođiheaddji Helle-Torill Sandvik preassadieđáhusas.
Seamma mihtut
Dárkkisteamis maid Stáhta geaidnodoaimmahat jođihii, ledje maid mielde Bargobearráigeahčču, Duolloeiseválddit, Vearroetáhta, Rádjepolitiijat ja Geaidnopolitiijat.
– Mis leat seamma golbma mihtu: buoridit johtolatsihkkarvuođa, dáhkidit buori bargobirrasa guorbmebiillavuddjiide ja govttolaš gilvoeavttuid fitnodagaide, dadjá Sandvik.
