Sámediggelahttu lohká leat dehálažžan ahte Sámediggi lea doppe gos olbmot leat.
Sámediggelahttu lohká leat dehálažžan ahte Sámediggi lea doppe gos olbmot leat.
Sámedikki dievasčoahkkin lágiduvvo Stuoradikki láhkadiggesálas čakčamánus. Lulli-Norgga válgabiire sámediggelahtut ja Norgga Sámiid Riikasearvvi áirasat Anita Persdatter Ravna ja Tor Gunnar Nystad lohkaba preassadieđáhusa bokte dehálažžan sámi politihka oažžut oidnosii.
– Lea dehálaš oažžut oidnosii sámi politihka, giela ja kultuvrra. Dasa lassin našunála ovddasvástádusa sámi áššiide čalmmustáhttit. Lea dehálaš boktit našunála mediaberoštumi sáme- ja eamiálbmotpolitihkkii, ja leat doppe gos politihkalaš fápmoguovddáš lea, lohká Ravna.
Áigot ovdánahttit gulahallama
– Mii áigut lágidit nu ahte parlameanttalahtut Stuoradikkis ja Sámedikkis besset deaivvadit ja ovdánahttit buoret oktavuođa ja gulahallama. Stuoradiggi bidjá dehálaš rámmaid našunála sámepolitihkkii ja lea dehálaš boahtteáiggi politihka ovdáneapmái, ahte lea buorre gulahallan Stuoradikki ja Sámedikki gaskkas, lohkaba Ravna ja Nystad.
Loga maid: Stuorradiggi bovdii Sámedikki
– Eará báikkiin dievasčoahkkin
NSR háliida Sámedikki eanet oidnosii ja ásahit buoret gulahallama politihkalaš fápmoguovddážiin.
Oslos leat ollu sámit ja jienasteaddjit. Go dál bidjet Sámedikki dievasčoahkkima Osloi lassána fuomášupmi, beroštupmi ja sámivuohta boahtá oidnosii.
– Oktii jagis galggašii lágidit dievasčoahkkima eará báikkis go Kárášjogas. Livčče maid buorre jus lullisámi ja julevsámi guovlluin fitnet buot sámediggelahtut guossis, loahpaha Ravna.
