Sámediggeráđđi reagere dasa go ráđđehusbellodagat ja Risttálaš álbmotbellodat leat soahpan doaibmasirdima ja regionođastusa ovdal go Sámediggi lea ožžon vejolašvuođa konsulteret doaibmasirdima birra.
Sámediggi lea sádden preassadieđáhusa šiehtadusa birra mii lea dahkkon ráđđehusbellodagaid ja Risttalaš álbmotbellodaga.
Sámediggi čállá: Buot doaibmabijuid ektui mat gusket sámi beroštumiide, lea konsulterengeatnegasvuohta Sámedikkiin, dat maid mat bohtet stuorradiggedieđáhusa oktavuođas.
Doaimmat mat leat evttohuvvon sirdot guoská johtolaga, ealáhusovdáneami, eanadoalu, álbmotdearvvašvuođa, gelbbolašvuođa ja kultuvrra surggiid siskkobeallai. Dát leat doaimmat mat maid gusket sámi beroštumiide.
– Mun oainnán ahte šiehtadus mii dál lea gaskkal Olgešbellodaga, Ovddádusbellodaga, Gurutbellodaga ja Risttalaš álbmotbellodaga, lea dahkkon almmá Sámedikki oassálastima haga prosessii. Mii leat juo iežamet dievasčoahkkinmearrádusa oktavuođas miessemánus regiovdnaođastusa áššis gaskkustan ahte lea moaitin veara, ahte mearrádus ovttastahttit Finnmárkku ja Romssa fylkkasuohkaniid dahkkui almmá konsulteremiid haga Sámedikkiin, ii ge lean dahkkon váikkuhusčielggadeapmi ovttastahttimis sámi beroštumiid birra, dadjá sámediggeráđđi Silje Karine Muotka preassadieđáhusas.
Vurdet beassat konsulteret
Sámediggi lea ovdal sádden ráđđehussii vuđolaš árvvoštallama das makkár fáttát sáhttet čuohcat sámi beroštumiide doaibmasirdimiin regionođastusas, ja leat dieđihan vuordámuša beassat konsulteret dán áššis viidáset proseassas.
– Mii galgat dál geavahit veahá áiggi geahčadit makkár doaimmat duođas sirdojuvvojit ja diehttelasat maid árvvoštallat movt dat bohtet čuohcat sámi servodagaide. Mii oaidnit juo dan šiehtadusas mii dál lea, ahte dat guoská áššiide mat čielgasit bohtet váikkuhit sámi beroštumiide, deattuha Muotka preassadieđáhusas.
Doaibmasirdin galgá čuovvuluvvot máŋgga čuovvovaš proseassa bokte ja earenoamážit iešguđet dieđáhusbargguid bokte.
– Dát ii dárbbaš iešalddis šaddat váttisvuohtan, muhto dat eaktuda ahte mii oažžut buot dieđuid ja ollislaš searvama buot proseassaide, ja diehttelasat maid ahte konsultašuvnnat duođas čađahuvvojit ovdal go mearrádusat dahkkojit, loahpaha Muotka preassadieđáhusas.