Sámedikkeráđi bušeahttaárvalusas evttohit lasihit doarjaga Noereh-searvai 75 duháhiin, nu oččosii searvi oktiibuot 200 duhát ruvnno njuolggodoarjjan.
Sámedikkeráđi bušeahttaárvalusas evttohit lasihit doarjaga Noereh-searvai 75 duháhiin, nu oččosii searvi oktiibuot 200 duhát ruvnno njuolggodoarjjan.
NSR sámedikkeáirras Sandra Márjá West lea ilus go bušeahttaárvalusas evttohuvvo lasihit daorjaga Noereh nuoraidsearvái.
– Lea illudahtti jus Noereh oažžu lasáhusa. Jus searvi galggaš leat nana jietna sámi nuoraid ovddas, de dárbbašit einnostahtti ja buriid bargoeavttuid, oaivvilda nuorra sámediggeáirras.
Noereh-searvi álggahuvvui 2009:s ja 2015:is beasai Sámedikki bušehttii fásta poastan, dalle juolluduvvui 125 duhát dán searvái.
– Fásta doarjja lea dehálaš organisašuvnnaide, ja soaitá erenoamáš dehálaš nuoraidservviide dego Noereh-searvái. Searvi ii galgga dušše ásahit ja doaimmahit organisašuvnna, dat ráhkada maid deaivvadanbáikkiid sámenuoraide, dadjá West.
Searvvis leat miellahtut miehtá riikka, ja das leat sierra báikkálaš searvvit Oslos ja Tromssas.
– Illudahttá mu go sáhttit vuoruhit nuoraid, dákkár jagi go Sámedikkebušeahtas leat duohta gáržžideamit, loahpa West preassadieđáhusastis.