-Almmuhus-
OĐĐASATDuđavaš doarjagiin Sámi Girjjálaš­vuođa­guovddážii

Duđavaš doarjagiin Sámi Girjjálaš­vuođa­guovddážii

View all posts Journalista

-

-

Norgga Sámiid Riikkasearvvi nubbejođiheaddji, Saia Marilena Stueng, lea hui duhtavaš go árvaluvvo doarjja Sámi girjjálašvuođaguovddážii Kárášjohkii dán jagi sámediggebušeahtas.

– Girjjálašvuođaguovddáš lea dehálaš girjjálašvuođagaskkusteaddji, ja mu mielas lea hui buorre go dál ožžot njuolggodoarjaga Sámedikkis, dadjá Stueng, guhte ieš lea Kárášjogas eret.

300 000 ruvnnu doarjjan

Girjjálašvuođaguovddáš doaimmaha earret eará girjegávppi Gávpi Kárášjogas. Sámediggeráđđi evttoha dán jagi 300 000 ruvnnu njuolggodoarjaga girjjálašvuođaguovddážii.

– Gávpi lea hui buorre girjegávpi mii čohkke sámi girjjálašvuođa. Eai leat galle báikki gos beassá vásihit girjegávppi man máŋga sámi lágádusa leat deavdán sámi mánáidgirjjiiguin, románaiguin ja fágagirjjálašvuođain, dadjá Stueng, guhte ieš lea girječálli.

Guoskevaš olles Sápmái

Lassin Gávpi girjegávpái de doaimmaha Girjjálašvuođaguovddáš maiddái girjjálašvuođa- ja kulturgaskkusteami, ja girjjálašvuođaguovddáš doallá lágidemiid sihke Kárášjogas ja eará báikkiin.

– Girjjálašvuođaguovddáš ii leat dušše Kárášjohkii girjjálašvuođa- ja kulturgaskkusteaddji, muhto olles Sápmái. Ieš lean iežan mastera oktavuođas logaldallan Gávppis sámi ráppapolitihka birra, muitala Stueng.

Buorre girjjálašvuođa- ja kulturpolitihkka

Stueng oaivvilda ahte doarjja mii dál boahtá sámediggebušeahta bokte lea buorre girjjálašvuođa- ja kulturpolitihkka NSR bealis.

– Lea dehálaš ahte mii doarjut sámi girjjálašvuođa sihke buvttadeami ja gaskkusteami . Girjegávppálaččat ja gaskkusteaddjit, nu mo Girjjálašvuođaguovddáš, leat dehálaččat sihke sámi girječálliide ja lágádusaide, ja dasa ahte nu olusat go vejolaš besset lohkat sámi girjjiid, loahpaha Stueng.

-Almmuhus-