Guokte boazosápmelačča leaba dubmejuvvon Hålogalándda lágamánnerievttis suoládan bohccuid ja verrošan boraspirebuhtadusain.
Økokrim vuittii Sis-Finnmárkku diggegotti guoddalan ášši mas guokte boazosápmelačča leigga áššáskuhtton rievdadan mearkkaid, verrošan boraspirebuhtadusain ja biinnidan bohccuid muhtinlágán reaidduin.
Hålogalándda lágamánneriekti lea cealkán duomu áššis, mas lea dubmen boazosápmelaččaguoktá giddagassii ja máksit ruovttoluotta boraspire buhtadusmáksima, čállá NRK Sápmi.
Duopmu
Boarrásat almmái lea dubmejuvvon guovtti jahkái ja viđa mánnui giddagassii ja nuorat dievdu fas jahkái ja gávcci mánnui giddagassii.
Hålogalándda lágamánneriekti lea váldán vuhtii stáhta gáibádusa, ahte boraspire buhtadusat gálget máksot ollislaččat ruovttoluotta. Boarrásat almmái lea dubmejuvvon máksit 850 932 kruvnnu ruovttoluotta ja nuorat almmái fas 836 796 kruvnnu, duopmu lei ovttajienalaččat.
Lassin šaddaba vel máksit badjelaš 20 000 kruvnna bohccuid ovddas mas leaba mearkkaid rievdadan.
