Guovdageainnu boazodoalli lea Sis-Finnmárkku diggegottis dubmehallan go lea dieđihan alddis unnit bohccuid vai oažžu máksot doarjaga.
Guovdageainnu boazodoalli lea Sis-Finnmárkku diggegottis dubmehallan go lea dieđihan alddis unnit bohccuid vai oažžu máksot doarjaga.
Boazodoalli, gii lea badjel 40-jahkásaš, ii mieđihan iežas sivalažžan, muitala iFinnmark mii ovddemus almmuhii ášši.
Oaččui doarjaga
Ovdal lei doarjjaortnet heivehuvvon nu ahte boazodolliin lei vejolaš ohcat doarjaga jus boazolohku lea unnit go 600 bohcco.
Doarjja galgá veahkkin boazodolliide doalahit boazologu vuollin, ortnet gávdno ain muhto dálá njuolggadusaid mielde sáhttá ohcat doarjaga jus leat čuvvon mearriduvvon boazologu.
2010:s lei ain «600-njuolggadus» doaimmas, dalle dieđihii dievdu njukčamánu 31.beaivvi 2010 ahte sudnos eamidiin leat 599 bohcco.
Dan logu vuođul oaččui boazodoalli 145 000 ruvnno máksot doarjjan stáhtas.
Guovvamánu 28. beaivvi 2011 čađahuvvui boazolohkan, ja boazolohkamis gávdne dievddus 809 bohcco.
Boazodoalloagronoma gáibidii doarjaga máksot ruovttoluotta.
Loga maid: Gula! Movt bat guoppar guoská dán áššái?
Mieđihii 809 heakka
Boazodoalli váiddii gáibádusa, ja mieđihii ahte rievttes boazolohku njukčamánu 31. beaivvi 2010 lei 809 bohcco.
Son gáibidii rievdadit mearrádusa vai alcces buorrin, ja vai ii dárbbaš máksit ruovttoluotta dan 145 000 ruvnno.
Boazodoalli čilgii dikkis ahte boazoealáhusas šaddet boazodoallit heivehallat boazologu vai leat vuollel 600 bohcco, ja mainna de ožžot doarjaga.
Duomus čállet:
«Diggi deattuha ahte (NN) lea dieđihan juste 599 bohcco boazodoallojagi loahpas, njukčamánu 31. beaivvi 2005/2006, 2007/2008, 2008/2009, 2009/2010 ja 2010/2011. Dat mielddisbuktá ahte (NN) lea vihtta jagi dieđihan sus leat juste 599 bohcco»
Ráhkadan gova
Diggi oaivvilda ahte dievddu boazologut, erenoamážit 2009/2010 logut, orrot leamen ráhkaduvvon vai addá gova ahte sus lea unnit eallu go rievtti mielde lea vai oažžu doarjaga man sus ii leat riekti oažžut.
Boazodoalloagronoma lea rehkenastán ođđasit doarjaga.
Dievdu dubmehalai maid go lea muitalan boasttu dieđuid áššis.
Guhkes áššemeannudanáigi lea váikkuhan dupmui.
Dikkis dieđihuvvui ahte váidda sáddejuvvui miessemánu 13. beaivvi 2014:s. Dat lea golbma jagi ja golbma mánu maŋŋel go fuomášedje ahte boazolohku lei 809.
Dievdu dubmehalai giddagassii 30 beaivái ja šaddá gokčat áššegoluid mat leat 3000 ruvnno.
