-Almmuhus-
-Almmuhus-
OĐĐASAT Dubmehalai 13 jagi giddagassii goddán Vibeche

Dubmehalai 13 jagi giddagassii goddán Vibeche

-

-

Lágamánneriekti unnidii goddinduomu jagiin, 49-jahkásaš dubmehallan 13 jagi giddagassii goddán mátta-sámi nissona.

49-jahkásaš dievdu dubmehalai vuos 14 jagi giddagassii maŋŋel go gottii mátta-sápmelačča Vibeche Sofie Falck Danielsen (48) ođđajagimánu 16. beaivvi čuovganeapmái diibmá Troanddimis. Almmái guoddalii ášši Frostating lágamanneriektái. Ášši gieđahallan álggi dramáhtalaččat go dubmehallan dievdu gesii ruovttoluotta guoddaleami sivalašvuođa gažaldagas ja mieđihii goddán nissona, čállá Adressa neahttaaviisa.

 

Vibeche-ášši

Ođđajagimánu 16. beaivvi 2014:s riŋgii Vibeche Sofie Falck Danielsen (48) ovttasássi (52) politiijaide ja logai ahte nisu jáhkkimis lea goddon ja ahte lea gávdnamis sudno oktasaš ásodagas. 

Politiijat eai gávdnan nissona ásodagas, ja álggahedje ohcanakšuvnna. Vihtta beaivvi maŋŋel gávdnui goddon nisu Nidelva jogas. 

Mátta-Trøndelaga diggegoddi dupmii 49-jahkásaš dievddu iešdáhtos goddán nissona. 

Frostating lágamánneriekti gieđahallagođii guoddaleami mannan maŋŋebárgga. 

Dievdu mieđan goddán nissona, muhto čilgii ahte su ovddeš ovttasássi lei mielde goddimis. Nisu lea bidjon háldogiddagassii maŋŋel dán čilgehusa, muhto ii mieđa sivalažžan. 

Lágamánneriekti dubmii dievddu 13 jagi giddagassii.

Unnidit ráŋggáštumi

Dievdu čilgii lágamánnerievttis ahte su ovddeš ovttasássi dat čuolastii Vibeche Sofie Falck Danielsena ákšuin nu ahte jámii. Áššáskuhttit leat dutkan 36-jahkásaš nissona, muhto heaittihedje ášši diibmá go eai gávdnan duođaštusaid. Lágamánneriekti čállá duomus ahte unnidit ráŋggáštusa jagiin go dievdu lea dagahan ahte ášši dutke vel vuđolat maŋŋel go seaguhii iežas ovddeš ovttasássi dása. Mannan gaskavahkku mearriduvvui maiddái ahte 36-jahkásaš bidjo gávcci vahkkui háldogiddagassii.

 

Veahki geažil jámii

Dievddu bealušteaddji, Steinar Wiik Sørvik, oaivvildii ahte su klieanta ráŋggáštusduopmu lei galgat vel eanet unniduvvot, son ákkastalai 11 jagi giddagasa doarvái. Lágamánneriekti ii vuhtiiváldán dán.

 – 49-jahkásačča oasálastin lea mearkkašahtti, son dat doalai Danielsena gitta vai su dalá ovttasássi lihkostuvai goddit nissona. Dievdu ii beroštan ášši duogážis, muhto oasálasttii dakkaviđe nuppi hiegis goddinčađaheamis, cealká Frostating lágamánneriekti.

 

Ii mieđa goddán

36-jahkásaš nisu gii dál čohkká háldogiddagasas ii mieđa goddán mátta-sápmelačča.

 – Son sivahallá mu vai ii oaččo nu garra duomu, dat lea eanemus logihkalaš mu mielas, čilgii 36-jahkásaš giddagasčoahkkimis. Nisu lea guoddalan mearrádusa čohkkát háldogiddagasas, vuossárgga gieđahallet guoddaleami.

 

 

- Advertisement -
-Almmuhus-