Sámi Aurora fitnodagas lea ođđa fálaldat Guovdageainnus, Drive -in camp.
«Drive- in» mearkkaša ahte sáhttá skuteriin vuodjit sin campii, go dat lea máđija alde eanus Martinjávrris davábealde márkana. Sámi Aurora lea ođđa fitnodat ja eaiggát Anders S. Buljo muitala sii áigot dál geahččalit orru go dása beroštupmi ovddosguvlui.
– Mii leat sirdán campa lagabui márkana vai ii leat guhkki olbmuide boahtit. Mis lea das stuora gámme ja fállat smávit lieggaborramuša dahje gáfe, ja das sáhttá maid geahččat dahje vuodjit herggiin jus háliida. Mii eat leat ovdal dán fállan, eat ge dieđe vuos man geasuheaddji dat šaddá, muhto šaddá somá oaidnit movt manná, muitala Buljo ja lasiha ahte sáhttet sihke gili olbmot ja turisttat finadit sin luhtte.
Buljo muitala vel ahte sin fitnodat lea pláneme doaimmaid viidáseappot, ja leat dál gulahallame stuora mátkeealáhusfitnodagaiguin fállat boazosámi vásáhusaid turisttaide Guovdageainnus.
