Guovdageainnu dievdu, guhte lei áššáskuhtton goddán nuppi dievddu Skiellehis, luitojuvvui duorastaga luovos giddagasas.
Guovdageainnu dievdu, guhte lei áššáskuhtton goddán nuppi dievddu Skiellehis, luitojuvvui duorastaga luovos giddagasas.
Guovdageainnu dievddu bealušteaddji, Jens Nystrøm, guhte bivddii iežas klieantta luitojuvvot luovos mannan bearjadaga juo, lohká Ávvirii ahte son ii oainne makkárge eará vejolašvuođa dál go ahte su klieanta áššehuvvá goddináššis.
– Skielleha diggegoddi čállá mearrádusas go leat mearridan mu klieantta luoitit luovos, ahte son ii leat šat balahuvvon iešdáhtus goddán, dahje eaktodáhtus goddán dan Ruoŧa dievddu, muitala Nystrøm Ávvirii.
Son lohká iežas ovdal vásihan dákkár mearrádusa, ja boađus das lei ahte áššehuvai son gii lei áššáskuhtton vearredaguin.
Norran áviisa čálii dán birra ovddemuš.
Hirpmástuvvan, muhto ilus
Áktor Andreas Nyberg lei ge áššáskuhttán Guovdageainnu dievddu ja gáibidan su dubmehallat iešdáhtus goddán 20-jahkásaš Ruoŧa dievddu, dahje molssaeaktun ahte dubmehallá eaktodáhtolaččat goddán.
Nyberg čuoččuhii su galgat čohkkát gaskal gávcci ja logi jagi.
Bealušteaddji muitala ahte su klieanta lei hirpmástuvvan maŋŋel mearrádusa.
(Ášši joatká gova vulobealde)
Govven: Nils Johan Vars (vuorkágovva)
Geahppánii dilli
– Sutnje geahppánii dilli hui sakka, ja son hirpmástuvai maid. Go diggegoddi ádjánii mearrádusa dahkamis, ahte luitet go luovos su vai eai, de dieđus mokta maid hedjonii dađi mielde. Dál son lei hui ilus go diggi leat jáhkkán su čilgehussii, muitala Nystrøm.
Nystrøm ii áiggo dadjat gos su klieanta lea dál, eará go ahte su leat luoitán duorastaga luovos.
Mearrádus bođii
Mannan bearjadaga go diggi loahpahuvvui Ubmis, ii dahkan diggegoddi makkárge mearrádusa dan dáfus galgá go Guovdageainnu dievdu luitojuvvot luovos giddagasas vai ii.
Dál liikká bođii diehtu Skielleha diggegottis, ahte Guovdageainnu dievddu leat luoitán luovos odne, duorastaga juo.
– Diibmu beal njealjis bođii munnje diehtu, ja mun válden ovttatmano oktavuođa iežan klieanttain, muitala Nystrøm vel loahpas.
Iežas várjalan
Guovdageainnu dievdu lea golggotmánu 9. beaivvi rájes leamaš giddagasas go lea áššáskuhtton čuggen Ruoŧa dievddu loge geardde.
Ruoŧa dievdu jámii de loahpas go varra guđii su.
Dikkis bođii ovdan ahte Guovdageainnu dievdu čuoččuhii iežas várjalan, go nubbi dievdu fallehii su niibbiin ja čuokkui Guovdageainnu dievddu gieđa, gieđavuoli, ja maid ii basttihan niibbi čađa biktasa čeabeha bokte.
Duopmu áššis celko juovlamánu 23. beaivvi.
