Porsáŋggu Bargiidbellodat manai maŋos 8 proseanttain, nu ferte irgalit Doarespolitihkalaš Listui (DpL).
– Lea heajos boađus go massit ovtta áirasa, erenoamážit go smiehtan man garrasit leat bargan válgagiččus. De oainnán ahte DpL, mii bođii dego akšuvdnabellodat válgagiččus, lea váikkuhan bohtosiidda ja árvideames váldán olu min jienain ja soitet maid eará bellodagain suoládan jienasteddjiid, dadjá Borch dalá maŋŋil go válgabohtosat almmuhuvvoje.
Bargiidbellodat áigu háleštit daid eará bellodagain.
– DpL lea hui čielgasit ovdanbuktán ahte háliidit doarjut gurutbeali, ja dáinna vuolggasajiin de jáhkán mis leat vejolažžan šiehttat buori ovttasbargošiehtadusa, dadjá Borch.
– Hálan go Porsáŋggu ođđa sátnejođiheddjiin dál?
– Dan in dieđe vuos. Sávan ahte mii oažžut sátnejođiheaddjiámmáha boahtte áigodagas, muhto dat lea DpL duohken mearredit ahte háliidit go doarjut min boahttevaš barggus.
Beahtahallan
Borch lohká iežas persovdnalaččat beahtahallan dainna go gávcciin proseanttain manne maŋos 2011 válggaid ektui, ja maiddái masse áirasa.
– Muhto seammás de vuhtiiválddán ahte olbmot leat jienastan DpL ja sin dorjon.
Áirasat gielddastivrii:
Olgeš 7
Bb 6 (-1)
DpL 3 (+3)
SG 1
GB 1
Ovddádusbellodat 1 (-2)
