Ođđa iskkadeapmi čájeha ahte oahpaheaddjit dovdet ahte eai leat nagodan čuovvulit hearkkes mánáid dan áigodagas go lei ruovttuoahpahus.
Iskkadeapmi čájeha ahte oahpaheaddjit leat vásihan ahte lei hástaleaddjin čuovvulit hearkkes ohppiid korona geažil. Eanas oahpaheaddjit leat kárten ja ožžon buori oppalašgeahčastaga das man olu hearkkes mánát leat skuvllain, muhto aŋkke vástidedje eanas oahpaheaddjit ahte leat dušše belohahkii nagodan čuovvulit ohppiid.
27 proseantta vuođđoskuvllaoahpaheddjiin vástidedje iskkadeamis ahte nagodedje čuovvulit hearkkes ohppiid dan dilis mii lei maŋŋel njukčamánu 12. beaivvi.
Muhto 6 proseantta vástidedje ahte sii eai nagodan čuovvulit ohppiid. Dat mearkkaša ahte 4.500 oahpaheaddji eai nagodan čuovvulit hearkkes ohppiid Norgga vuođđoskuvllain. Statistalaš guovddášdoaimmahaga (SSB) loguid mielde leat 75.000 vuođđoskuvllaoahpaheaddji Norggas.
60 proseantta vástidedje ahte sii nagodedje dušše belohahkii čuovvulit ohppiid.
Olu oahpaheaddjit dieđihit maid ahte eai leat olahan oktavuođa muhtin ohppiiguin.
