Otne hávdáduvvui dovddus sámeaktivista Niillasa Iŋger Ánná, dahje Inger Anna Sara Gaup. Son lei okta dan 13 nissonis geat čoahkkinaste stádaministara Gro Harlem Brundtlanda kantuvrras 1981:s ja deaivvadii Poavain Vatikánas.
Niillasa Iŋger Ánná riegádii cuoŋománu 2. beaivvi 1942:s ja lei okta dan 13 nissonis geat guovvamánu 6. beaivvi 1981:s čoahkkinaste Norgga stádaministariin Gro Harlem Brundtlandain Álttá-akšuvnna birra. Diibmobeali bisttii čoahkkin ovdal Brundtland guđii čoahkkima, go sus ledje eará áššit maid galggai čoavdit dan beaivvi.
Sápmelaččat báhce čohkkát kantuvrii ja 19 diimmu maŋŋel, birrasiid diibmu njealjis ihkku, vižže politiijat nissoniid olggos kantuvrras.
Ovttas Ellen Marit Gaup Dunfjeldain beasai Inger Anna deaivat Poava Johannes Paul II Vatikánas. Doppe soai muitaleigga Álttá-akšuvnna ja sápmelaččaid vuoigatvuođarahčamiid birra.
Nieiddaš
Dan 13 nissonolbmo mielde lei maid okta 5-jahkásaš nieiddaš, Ellen Kristina Saba. Son lea Inger Anna siessal ja lei ge vuolgán eatnis mielde oaivegávpogii. Dál lea Saba rávesolmmoš, politihkkár, ja muitá sihke iežas siesá ja Oslo vásáhusa bures.
– Inger Anna lei okta njunuš nissoniin go mii leimmet Oslos. Álttá-akšuvdna lei dehálaš ášši mii čuozai sutnje. Mun muittán ahte son lei hui čeahppi ákkastallat ášši ja hállat sámi kultuvrra birra. Son hálai čehpet váikkuhusaid birra ja mo dulvadeapmi boahtá čuohcat boazodollui. Son ii lean dakkár olmmoš gii liikui ovddidit iežas ja iežas nama, muhto áššiid gal ovddidii. Son lei mu stuorámus ovdagovva ja láidesteaddji, muittaša Saba.
– Ii ballan ovddasvástádusas
Ellen Kristina muitala ahte siessá lei dakkár gii liikui váldit ovddasvástádusa ja ii ge ballan ákkastallat. Son maid ii ballan vuolggahit ovdáneami sámi ja boazodoalu ektui, ja dat soaitá ge leat ágga manne son beasai Sámediggeáirrasin 93:s 97 rádjai.
– Son lei hui nanus nissonolbmuid ektui ja dávjá válddii nissonolbmuid beali. Son ovddidii boazodoalloáššiid ja muđui ge sámi áššiid, muitala Saba.
– Son lei dakkár olmmoš gii sáhtii čájehit dovdduid maid. Álo go deaivvadeimme, de lávii dollet mu birra ja sáhtiime čierrut fárrolaga. Sus lei hui stuora váibmu, muittaša son.
– Čeahpes duojár
– Son lei máilmmi čeahpes duojár, son goarui gápmagiid ja eará dujiid. Sus lei maid boazolihkku ja oaččui hui buori oktavuođa bohccuiguin. Son lei earenoamáš čeahppi dápmat herggiid ja sus lei dakkár earenoamašvuohta ja máhttu boazodilis. Ja son maid dovddai ealáhusa hui bures. Sáhttá lohkat ahte boazodoallu lea čuvvon su riegádeamis gitta hávdái.
