Sámediggeáirras Ida Marie Bransfjell oaččui ikte oalle erenoamáš juovlaskeaŋkka iežas mánnávuođaustibis ja bellodatguoimmis.
Sámediggeáirras Ida Marie Bransfjell oaččui ikte oalle erenoamáš juovlaskeaŋkka iežas mánnávuođaustibis ja bellodatguoimmis.
– Dát lei šohkka. Dál dieđán mo lea oažžut stuorra skeaŋkka dahje vuoitit Lottos, muhto dát orro vel stuorát skeaŋka go lottovuoitu, go leat nu olusat searvan dása, giitá Ida Marie ja muitala alddis jorran vaikke makkár jurdagiid go mánnávuođaustit Ellinor Marita Jåma muitalii sutnje skeaŋkka birra.
Ellinor Marita Jåma, gean eatnašat dovdet Åarjel- Saemiej Gïelh sámediggeáirrasin, dahje Norgga Boazosápmelaččaid Riikkasearvvi jođiheaddjin, beasai ikte addit erenoamáš skeaŋkka iežas bellodatguoibmái ja mánnávuođaustibii Ida Marie Bransfjellii.
– Lea leamaš áibbas váivi doalahit dán čiegusvuođa, ja ballen oalle ládje mo son reagere, muitala Jåma.
Heajos oaidnu
Ovdal čuohpadeami lei Ida Marie Bransfjellas oaidnu -9, dasa lassin lea vel skielgá.
– Mun in láven oaidnit albma ládje čalbmelásiiguin in ge linssaiguin, danne čalbmedoaktárat ávžžuhedje mu geahččalit čuohpahit čalmmiid dán ICL-vuogi mielde. Dat mearkkaša ahte leat mu čalmmiide darvehan linssaid, čilge Ida Marie. Son lea jo čuohpaduvvon, dát gárttai máksit 65 duhát ruvnnu.
– Dát lea guhkit áigái čoavddus ja mánu geahčen de galgá visot leat ortnegis, čilge Ida Marie, guhte mánu šaddá atnit erenoamáš čalbmelásiid ja čalbmegoaikkanasaid.
Son ii loga iežas vuos riekta ádden ahte lea ožžon ná stuorra skeaŋkka.
56 duhát ruvnnu ledje Ida Marie oahppásat ja maiddái amas olbmot čoaggán sutnje divrras čalbmečuohpaheami várás.
Giitá buohkaid
– Mun goittot ge háliidan giitit buohkaid geat leat juolludan ruđa munnje, sihke sin geaid dovddan ja geaid in dovdda. Sávvamis beasan dađistaga buohkaid buorrestit vel, lohká Ida Marie ja sávvá buohkaide ráfálaš juovlabasiid:
– Buoret juovlaskeaŋkka in lean sáhttit oažžut go dán. Dovddan ahte lean čalmmiid ožžon skeaŋkan.
Čiegadan máŋga vahkku
Ievttá dáhpáhussii lei Ellinor Marita Jåma ráhkkanan oalle guhká, moadde vahkku áigi ráhkadii son oainnat čiegus facebook-joavkku man gohčodii «En hjelpende hånd» man sámegillii sáhtašii jorgalit Veahkkás giehtan.
Ulbmil joavkkus lei čoaggit ruđa Ida Marie Bransfjell čalbmečuohpadeapmái, mii mávssii 65 000 ruvnnu. Dát lea oalle divrras Bransfjellii, guhte lea oktoeadni.
– Ida Marie lea nu máilmme buorre olmmoš, son álot fállá veahki ja veahkeha earáid vel dalle ge go ii nákcešii. Danne háliideimme moai Katarina Blindain addit sutnje skeaŋkka ruovttoluotta, muitala Jåma.
Illá asttai gullat
Ikte de beasai Ellinor Marita Jåma geiget Ida Mariei šeahka, 56 duhát ruvnnu lei ievttážii čoggon ruhta.
– Mun lohkagohten buot sin namaid geat leat addán ruđa, muhto in muitalan manne mun lohken namaid. Ida Marie mielas lei láittas gullat buot namaid, nu ahte de šadden muitalit mii dát rievtti mielde lei. De gal illosii nu ahte goasii biškugoahtá vel, ieš logai ahte jus su nieiddaš ii livčče leamaš nuppe lanjas oađđimin de gal lei huikigoahtit, čaibmá Jåma.
Son lea hirpmahuvvon go nie olu čoggui ruhta.
– Moai Katarinain ean jáhkkán ná olu čoggot, ja livččiime leamaš duhtavaččat jus dušše veahá lei čoggot. Lean nu giitevaš go olbmot ná olu leat addán ja go gávdnojit ná olu liekkus ja váibmoláđis olbmot, giitala Jåma.
